Kanestrøm kjem tilbake til Os

Tidleg i vinter fortalte Erik Kanestrøm, toppskårar for Os 5 av dei 6 siste sesongane, at han ville gje seg på Os grunna pendling til Oslo for mastergradstudie.

I vår blei det klart at Kanestrøm «trappa ned i divisjonen over», han skåra også i debuten for Øystese.

– Eg har trivst godt i Øysese, med fine lagkameratar og ein god trenar, seier Erik til Midtsiden.

– Hovudårsaka til at eg no vil tilbake til Os er at neste del av studiet mitt er i Bergen, og då er det enklast for meg å reisa til Os for å trena og spela. Men eg er naturlegvis òg glad for å vera tilbake, ikkje minst fordi eg får sjanse til å hjelpa klubben min å koma opp igjen i 3. divisjon.

Låner vekk Fabian Bødtker

På Kuventræ er dei naturlegvis nøgde med å få Erik tilbake.

– Han er nærmast ein garantist for både mål og målgjevande pasningar, og er ein veldig fin person å ha i gruppa, seier dagleg leiar og lagkamerat Endre Brenne.

Då Øystese mista Erik spurde dei om Os hadde ein annan god spiss på lur.

– Som del av avtalen får dei no låna Fabian Bødtker i éin månad. Fabian er ein spelar vi har stor tru på, og vi trur det kan vera godt for utviklinga hans med nokre kampar eitt nivå opp.

Bødtker skåra fire mål i éin omgang i Norway Cup, både i år (3,5 mål) og i 2016. I år har han skåra 4 mål på 4 kampar for A-laget, og han har allereie spelt to kampar for Øystese.

Os startar haustsesongen heime mot Fyllingsdalen 2 førstkomande søndag.

I kveld speler dei treningskamp, 3 x 25 minutt, mot Gneist.