Sport | 05. apr. 2018

Kanestrøm skåra i debut for ny klubb

Tidlegare toppskårar for Os «trappar ned» i divisjonen over - saman med fleire tidlegare Os-spelarar.

Kanestrøm skåra i debut for ny klubb
Erik Kanestrøm, her då Os slo Øystese 3-0 i 2016, skåra i gårsdagens debut. (Foto: KVB)
Kjetil Vasby Bruarøy
Kjetil Vasby Bruarøytorsdag 05. apr. 2018 08:29

Erik Kanestrøm, som har vore toppskårar for Os i 5 av dei siste 6 sesongane, fortalte i januar at han gir seg på Os.

– Eg starta på eit treårig mastergradstudie i haust. I den dramatiske sesonginnspurten prioriterte eg fotball, men studiet er i Oslo, og blir for tidkrevjande til at eg kan halda fram med denne treningsmengda, sa Erik til Midtsiden på nyåret.

I går debuterte han for Øystese og sette inn Øystese sitt tredje mål i andre ekstraomgang då Øystese slo Gnist 3-1 borte i andre kvalifiseringsrunde til NM.

Opp eit nivå for å trappa ned?

Kanestrøm signerte i påsken og enda dermed med å «trappa ned» på nivået over Os.

Øystese, som etter nedrykk til 4. divisjon let Divaldo Cardoso gå til Os, rykte opp igjen til 3. divisjon i fjor og er blant anna Lysekloster sin motstandar i år.

– Etter å ha fått fotball litt på avstand kjente eg at eg sakna å spela.

– Eg følte det ikkje var rett å be om særordning med mindre treningsdeltaking i Os. Øystese har vist interesse fleire gongar, og har fleire som er i min situasjon, at dei ikkje har tid til å følgja full opplegg med fellestreningar. Dei har dessutan minst éi trening i Bergen i veka.

Debuten var Kanestrøm sin første kamp på 6 månadar - og varte dessutan i 120 minutt.

– Det var tungt, men kondisen heldt heldigvis.

Gamle lagkameratar - og motstandarar

– Tremenningen min Andreas Kanestrøm spelte på Øystese i fjor, og blir kanskje med i år. Eg høyrde litt med han om korleis det var i klubben. Eg kjenner også nokre av dei andre spelarane, og har fått eit veldig godt førsteinntrykk.

Tidlegare Os-spelar Tor Erik Kjosås Berge har spelt på Øystese i fleire år, og er ifølgje Kanestrøm truleg med ein viss grad i år òg. Den unge keeperen Henrik Mjelva frå Søfteland, som spelte ungdomsåra for Os og var i Lysekloster før han reiste til Bodø, er tilbake i sør og er òg ny i klubben.

Mjelva vakta buret i gårsdagens kamp.

I tillegg har tidlegare Lysekloster- og Søfteland-spelar Preben SKorpen, som skadde foten sin i oppkøyringa med Os i fjor, gått til Øystese. Også Sebastian Skåre Tune, som hadde ein halv sesong i Os i 2016, blir blant Kanestrøm sine nye lagkameratar.

Spennande? Vil du ha ukas høgdepunkt i innboksen?

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.