Kantra båt utløyste alarm
Brannvesenet kom rett frå øving då dei brått fekk bruk for lensepumpene.
Måndag i 20.30-tida fekk brannvesenet melding frå 110-sentralen om båt som sokk utanfor gjestebrygga i Os sentrum.
– Det blei raskt klart at det ikkje var folk om bord, seier brann- og redningssjef Stein Gjøsund.
Brannvesenet hjelpte likevel til med å få lensa båten. Eigar var på staden og tok hand om påhengsmotoren.
Frå øving til praksis
– Vi fekk løfta den rett over vasskorpa så båten kunne lensast. Vi kom faktisk rett frå øving med pumper og anna lenseutstyr då vi brått fekk prøva det vi nettopp hadde terpa på.
Båten var full i vatn og låg med hekken mot elva då den blei fylt med vatn og kantra.
Fleire bør ausast
– Eg ser at det er fleire båtar i Os hamn som eigarane burde følgt betre med. Det gjeld å passa på så det offentlege slepp å ta tak i det, spesielt med tanke på forureining.
Eigaren av båten som blei redda i kveld, eller forsikringsselskapet hans, kan venta seg ein liten faktura frå brannvesenet for innsatsen.
Trudde dei hadde pipebrann
Den våte helga var roleg hos brannvesenet, men også dårleg sommarvêr kan skapa situasjonar som brannvesenet blir kopla inn i, utan at dei er relatert til båtliv.
– Rundt midnatt natt til laurdag blei vi kontakta av nokre kvinner som var på hyttetur utanfor Halhjem.
– Dei hade fyrt i ein omn det ikkje har vore fyr i på ei stund, og fekk røyk inn i hytta.
– Eg forklarte dei kva symptom dei skulle sjå etter, og dei har nok ikkje hatt pipebrann. Truleg har den kalde pipa og vindstyrken gjort at dei har fått eit røyknedslag, seier Gjøsund.