KAOS i sentrum
Nei, det er ikkje parkeringstilhøva eller bråk vi siktar til. Derimot eit nytt kunstnariskt innslag i bygda.

Fire målarglade damer møtast ein gong i veka for å måla og løyse verdsproblem. Det er desse fire som til saman skapar KAOS (Kunstamatørar i Os).
- Då vi såg at lokala her på Oshjørnet var ledige tok vi kontakt med huseigar for å høra om vi kunne få leia dei ein månads tid, fortel Reidun Bjørø.
Saman med Solveig Fismen, Ingerid Sulen og Ruth B. Bjørø utgjer ho det nye skotet på kunstnarstamma i Os.
Vel, nye kunstnarar er det vel ikkje heilt riktig å kalla dei.
Reidun, Solveig og Ingerid har alle stilt ut tidlegare, men aldri saman og aldri på Os.
Godt motteken
Utstillingen deira opna laurdag for ei veke sidan.
- Det blei ei fantastisk opning med mykje folk og interessant historieforteljing frå Nils Georg Brekke, fortel dei tre damene.
Brekke fortalt historia om sundagsmalarane. Ein gjeng amatørar han kom over i Missouri, USA som minna litt om osdamene. Dei møttes kvar sundag til måling og drøs fordi det var den einaste dagen dei hadde tid.
Dyr og natur
Ein fellesnemnar i utstillinga er natur i eit vidt begrep. Her finn vi siglande skuter i flotte omgjevnadar, trolske fjell og sjarmerande dyr.
- Sjølv om det er ein fellesnemnar er det likevel fire forskjellige stilar, forklarar Ruth Bjørø som håpar mange legg turen innom når dei er på Os.
Utstillinga er open torsdag til sundag kvar veke ut juni.