– Kjipt å bli tatt

Torsdag kveld blei ein mann i 20-åra tatt for å kjøra moped utan førarkort.

I tillegg fann politiet mindre mengder hasj i lomma hans.

– Dette var utruleg kjipt, for det kom folk forbi medan eg sto med politiet, og når dei no kan lesa at eg hadde hasj i lommene så føler eg at det blir litt urettvist, seier mopedføraren til Midtsiden.

Etter ein periode med usunne rusvaner tok han nemleg tak i problemet i mai i år.

– Sidan har eg vore rusfri. Det har ikkje vore så lett, men eg har klart det. Hasjen låg i ein jakke eg ikkje har brukt på år og dag, forklarar han.

Prøvde å stikka av

Mopedføraren fortel sjølv at han møtte politiet då han var på veg til Strøno. Patruljen snudde ved brua og følgte etter.

– Eg tenkte eg skulle prøva å stikka av, og sjølv om eg hadde dei heilt opp i hekken opp bakken til Nordstrøno, så gav eg ikkje opp.

Jakta gjekk forbi skulen, forbi eit nabolag og eit stykke ned ein traktorsti før mopedføraren gav opp.

– Det var litt folk ute og gjekk og eg tenkte det kunne vera farleg om vi heldt fram.

Angrar på avstikk

– Sjølv så sakka eg av forbi skulen, men eg har høyrt frå nokre vegarbeidarar at dei synes politiet kjørte for fort forbi skulen og at dei kanskje vil rapportera jakta.

Mopedføraren innrømmer samtidig at det ikkje burde blitt noko jakt.

– Det var dumt av meg å prøva å stikka av. Der og då tenkte eg at det var verdt forsøket, men eg burde ikkje gjort det, seier mopedisten.

Mopeden blei avskilta og mannen er meldt for forholdet.