Kjørte forbi billettluka
Eit vanleg problem: Den utanlandske traileren blei dermed ståande igjen då ferja gjekk.
Onsdag blei ein utanlandsk trailer ståande igjen på ferjekaien etter ikkje å stoppa ved billettluka.
– Dette skjer dessverre innimellom, at bilar kjører rett forbi billettluka. Regelen då er at dei må kjøra ut av køen og opp igjen og betala, seier driftssjef Oscar Bergheim i Fjord1.
Dette fører som oftast til at vedkomande ikkje rekk ferja.
Eit vanleg problem
Ofte er nok kjøring forbi billettluka eit forsøk på å kjøra gratis. Prisen for ein trailer opptil 22 meter er frå nyttår 1232 kroner, for bilar opptil 19 meter 1120 kroner.
– Fleire av dei utanlandske seier dei ikkje har pengar. Men når dei får tenkt seg om viser det seg gjerne at dei har midlar likevel, seier Bergheim.
Pendlarar og norske yrkessjåførar bruker som oftast verdikort, noko som gjev 50 prosent rabatt.
Skal alltid stoppa i luka
Det hender at bilar, om dei kjem rett før ferja skal gå, blir vinka forbi billetluka for å rekka ferja. Då må dei løysa billett om bord.
– Men ingen kan velja sjølv om dei vil betala i luka eller om bord. Alle som kjører forbi billettluka utan at dei blir vinka forbi blir sendt opp igjen. Det gjeld også personbilar, åtvarar Bergheim.
– Vi har ikkje så komplisert regelverk på ferjekaien, men akkurat det å stoppa og løysa billett bør alle klara, legg han til.
E39 stengt:
Dette med sniking blir nok ikkje eit problem i dag. E39 til Stavanger er nemleg stengt grunna orkan og innstilte ferjer over Boknafjorden.
Ny ferje:
I desse dagar overtar Fjord1 ei ny ferje, neste generasjons gassferje, som skal i drift på Halhjem - Sandvikvåg frå måndag 16. januar.