midtsiden

Kjørte i fjellveggen

To personar sat i bilen som kjørte utfor Halhjemsvegen sundag kveld.

image
image
image
Av: Kjetil Vasby Bruarøy

Sundag klokka 17.27 kom meldinga om utforkjøring på Halhjemsvegen nær avkjørsla til Lepsøy.

- Først fekk vi melding om at to personar sat fastklemt, men då brannvesenet kom på plass og fekk drege bilen ned frå fjellsida fekk dei opp døra, opplyser operasjonsleiar i Hordaland politidistrikt, Jan Steimler til Midtsiden.no.

Luftambulansen rykte ut, men returnerte utan pasient om bord. Dei to i bilen, ein mann og ei kvinne i 60-åra, blei frakta til Haukeland universitetssjukehus for sjekk.

På halv åtte
Bilen hadde retning Halhjem då den kjørte i fjellveggen like etter avkjørsla til Lepsøy. Då brannvesenet kom fram til ulykkesstaden sto bilen om lag 45 gradar oppetter fjellsida.

- Det såg dramatisk ut, men hadde heldigvis gått ganske bra. Vi festa vire i bilen og hadde ambulansepersonell om bord med passasjerane då vi taua den ned i grøfta, seier brannsjef Stein Gjøsund.

- Blant dei første som kom til staden var ei heimesjukepleiar, og ho var med på å halda situasjonen under kontroll.

Det var stopp i trafikken ein kort periode etter ulykka, men så blei bilane dirigert forbi medan redningsarbeidet heldt fram.

Klokka 18.15 blei vraket fjerna.

Fleire saker