Klare for å heia fram Erik
– Den er litt som Gåssand, seier Stephan Plätzer, om løypa som blant anna går forbi Buckingham Palace. I ettermiddag går Erik Tysse 20 km i OL i London.
Onsdag reiste Erik Tysse og trenaren og svogeren Stephan Plätzer til London for å førebu seg på Tysse sin 20 kilometer i kappgang.
Tysse går klokka 18.00 norsk tid. Løpet blir vist på NRK.
– Det blei som venta massivt å møta pressen onsdag, Erik fekk knapt setja seg i stolen. Men eg synes han var veldig flink, seier Stephan.
– Journalistane var veldig aggressive og det gjekk 30 minutt før dei første sportslege spørsmåla kom.
– Tøff, men gunstig løype
Erik rakk å sona ferdig dopingdommen han har prøvd å bli frikjent frå før OL. Etter å ha kvalifisert seg i Os den einaste datoen han kunne kvalifisert seg er han i dag klar til sin første internasjonale konkurranse på to år.
– Han har fått trent som han skulle her borte og han føler seg veldig bra, seier trenaren.
Løypa er inspisert og Plätzer trur den passar Tysse bra.
– Den er ikkje heilt flat, og med litt grov asfalt. Det er nok meir uvant for andre enn for Erik, og dette med bakkar er han vant med frå treningsløypa inn mot Gåssand.
Handballdamer og familie støttar opp
– Eg forstår at Erik si sak er omdiskutert og at enkelte synes det er rart å ha han tilbake. Det har vore ei vanskeleg sak for mange, dette.
– Men det er kjekt å sjå andre utøvarar, som dei norske handballdamene, heia på Erik når han er ute og trener.
Også familien stiller mannsterk opp for å støtta Erik gjennom dei 10 rundane i den 2 kilometer lange løypa.
– Dei har fine dagar som turist her i London. Eg og Erik er stort sett i OL-landsbyen, men i går møtte vi familien på eit kjøpesenter rett utanfor leiren, fortel Stephan, seks timar før løpet til Erik Tysse.