Klassesiger i Bergen – Voss

Laurdag gjekk sykkelrittet Bergen–Voss av stabelen med færre deltakarar enn i fjor, men likevel over 3000 som gjennomførte, fleire av desse frå Os.

Lars Erlend Brattabø frå Os vann klassen menn 50-59 år og kom på 12. plass uansett klasse.

4 minutt bak vinnaren

Brattabø kom i mål på den knallsterke tida 4:13,30, berre 4,07 minutt bak vinnaren, Fredrik Olsen frå Åsane CK.

– Dette er ny personleg rekord, seier Lars til Midtsiden.no.

– Eg var del av førstepulja på 50 ryttarar. Gruppa blei splitta i Trengereid opp mot Gullfjellet, der nokre gode klatrarar sykla i frå oss. Men vi blei ein gjeng på rundt 25 som samarbeidde godt innover Hardangerfjorden.

Opp Skjervet og innover mot Voss var det fleire som ramla ifrå, men Brattabø heldt koken heilt til mål og var berre 32 sekund frå 7. plass.

Ein god treningsvinter

Lars Erlend meldte seg inn i arrangørklubben Bergen CK då han for nokre år sidan byrja med triathlon. Seinare gjekk han over på berre sykling, men har halde fram som medlem i klubben sjølv om han bur i Os.

– Vi har ein flott klubb i Os og eg blir nok medlem i CK Henie med tida. Men eg har mange gode venar og treningskameratar i Bergen CK òg, så førebels har eg blitt verande.

Årsaka til den sterke tida i årets ritt mellom Bergen og Voss er han ikkje heilt sikker på.

– Men det har nok litt med den varme vinteren å gjera. Vanlegvis blir det mykje ski om vinteren, men i år blei det ekstra mykje sykling, så det har nok hatt innverknad.

Har ikkje tatt skrekken

Litt knall og fall kan det dessverre bli når du driv med sykling, og seinast i fjor hadde Brattabø eit fall der han knakk nokre ribbein.

Men meir alvorleg var det då han, for nokre år sidan, blei påkjørt av ein bil då han var på trening i Os.

– Då var eg vekke frå trening i rundt eit halvt år.

– Har ulykka påverka deg som syklist?

– Ja, den har nok det. Minnene frå ulykka ligg i bakhovudet når eg sit på sykkelen. I tillegg blir du litt meir varsam med alderen.

– Men det er noko eige med det å sykla ritt, du får litt adrenalin og held fokus på kjøringa, frykten er vekke.

36 deltakarar frå CK Henie

CK Henie stilte sterkt i årets Bergen-Voss med 36 deltakarar.

Raskaste mann var Samuel Nordang som kom i mål på 4:20,55, som heldt til 63. plass uansett klasse og 25. plass i klassen menn 30-39 år.

Raskaste kvinne frå CK Henie var Monica W. Ramsvik, som kom i mål på 5:15,52 og landa på 6. plass i klassen kvinner 30-39 år.

Jan Haugland var eldste deltakar og landa på 11. plass i klassen menn + 70 år.

CK Henie hadde 16 deltakarar i mål på under 5 timar.

Tidene til alle i klubben finn du i bildefila i høgre marg.

Her finn du full resultatliste.