Klassisk sommar

For tredje sommaren på rad kjem Musica Nord med eit klassisk konserttilbod i Greigsamlinga. Ein serie på heile åtte konsertar skal spelast frå sundag 29. juni.

– Det er ganske unikt i norsk kulturhussamanheng.

– Dei fleste vel å stengja kulturhusa om sommaren, men vi ønskjer å vera eit levande kulturhus også om sommarane.

– Difor er vi glade for at Musica Nord vel å legga sin konsertserie kvar sundag i sommar, smiler Oseanadirektør Ole Tobias Lindeberg.

Lett og tilgjengeleg

Medan dei i fjor valde å køyre konsertrekka som matinékonsertar, har dei i år gått tilbake til konsertar litt seinare på ettermiddagen.

– Vi håpar at konsertar klokka 18 kan vera ei god avslutning på ei sommarveke, gjerne kombinert med eit godt måltid i restauranten.

– Reportoaret er lett og sommarleg. Kvar konsert er omlag på ein times tid, fortel kulturhusvert Janne Mari Hjelle.

Avsluttar med Figaros bryllup

For dei som kanskje ikkje frekventerar kammerkonsertar på fast basis, kan konsertane vera ein fin introduksjon til ein ny sjanger.

– Reportoraret er allsidig frå Schumanns «Fantasistykker» som vi startar serien med til Figaros bryllup i konsertversjon som avsluttar det heile 17. august.

– Det heile skal kle Greigsamlinga og den nye flotte uteplassen som er iferd med å ta form, avsluttar Lindeberg.