Klokkene får ikkje henga i fred

Mange gler seg over «Brukameratane» sin innsats i terrenget rundt Os sentrum.

Ei gruppe driftige pensjonistar har både stått for realisering av Knutabruo og halde fram med bygging av gapahukar, utplassering av benkar og vedlikehald av populære turområde langs Oselvo og på Borgafjellet.

• Sjå video: Hyllar Brukameratane med denne videoen

Men heller ikkje i naturen får alt stå i fred. Tidlegare har det vore hærverk på det eine gjerdet til brua. Brukameratane har òg kome med fleire oppmodingar om ikkje gå laus på trea nærmast gapahukane med kniv.

Dei har òg hatt ei klokke hengande i eit tre ved den største gapahuken.

– No lurer vi på om tida har gått frå oss, seier brukamerat Peder Fløysand.

Tonen er spøkefull, men Fløysand er samtidig alvorleg.

– Den første klokka blei knust, no er den andre klokka stolen.

Skruene den var festa med er klippa rett av, noko som gjer at Fløysand trur det er vaksne som har stole klokka.

– Vi gler oss over å høyra at mange set pris på installasjonane og vedlikehaldet av dei ulike plassane, samtidig er det nesten så vi mister gnisten til å gjera noko for fellesskapen når vi opplever hærverk og tjuveri, fortviler han.