Os G16, her under Norway Cup. (Foto: Endre Brenne for Midtsiden)

KM-finale med to mål på overtid

Os skåra frå midtbanen og slo Sædalen i ein thriller av ein kamp.

Av: Kjetil Vasby Bruarøy

Os gutar 16 spelte laurdag KM-finale i 2. divisjon mot Sædalen. Kampen gjekk på Kalandseid.

– Vi hamna under, men snudde kampen. Så skjedde det mykje spennande mot slutten, seier trenar Ørjan Sandal, som nyleg vann KM-finalen i 1. divisjon med Nore Neset/Os J17.

Sædalen - Os 3-5 (2-1)
Målskårarar, Os: Elias Heggland Myrlid 2, Henrik Johannessen 2 og Simeon Bizimana.

Os hamna under 1-2 til pause, etter mål av Elias, men Henrik Johannessen sendte Os i føringa igjen med to tette skåringar.

– Vi leia 3-2 til det var eitt minutt igjen. Sædalen utlikna, men vi hadde heldigvis meir på lur.

Sandal seier Os ikkje var heilt der dei skulle vera dei første 20 minuttane, men at dei spelte seg stadig betre utover i finalen.

Simeon blei matchvinnar eitt minutt på overtid, men så fekk Sædalen corner.

– Dei flytta opp heile laget, keeper inkludert. Men vi fekk klarert, og låg igjen med éin mann. Elias fyrte av langs bakken, omtrent frå midtbanen, og med 5-3-skåring var det avgjort.

Ein haust utan tap

Os spelte i 1. divisjon i vår, men hamna nest nedst på tabellen og rykte ned til sommaren.

– Våren var ikkje så verst, vi spelte mange jamne kampar. Vi har møtt god motstand i 2. divisjon òg, med blant andre førstelaga til Nest Sotra, Bremnes og Bjarg. I Sædalen si pulje spelte blant andre Arna-Bjørnar og Gneist sine førstelag.

Gutefotballen blir òg, frå klubb til klubb, påverka av kva seniortilbod klubben har. For Os sin del har 3 gutar vore i A-stallen, 7 har spelt for Os 2 senior i 5. divisjon.

Likevel har Os G16 hatt ein sterk haust, med 7 sigrar, 1 uavgjort og 0 tap. Målforskjellen landa på 29-8.

Tabell (fotball.no)

Fleire saker