Kniper inn på fotballferien

Os runda av vårsesongen med 7-0-siger og avansement til toppen av tabellen. Etter ferien ventar heimekamp mot 3. plassen (Fyllingsdalen 2) og bortekamp mot 2. plassen (Lyngbø) som dei to første rundane av haustsesongen.

Etter ein periode på 7,5 veker (!) utan kamp.

– Eg synest det er altfor langt opphald mellom siste kamp i vårsesongen og første på hausten. Opphaldet burde vore korta ned med minst ei veke i begge endar av ferien, meiner Os-trenar Tim Henrik Sperrevik.

– Vi har ikkje tatt fri alle desse vekene, sånn at det er sagt!

Deler opp ferien

Os-spelarane fekk fri 1,5 veke etter siste serierunde i vår, 20. juni, for så å trena saman to veker igjen.

– Dei får to veker til med fri frå gruppetrening, men sjølvsagt med eigentrening, så trener vi to veker saman igjen.

– Frå 30. juli er det full drift igjen, seier Sperrevik.

Hauster startar med heimekamp mot Fyllingsdalen 2 søndag 12. august.

– Laget snubla borte mot Fyllingsdalen 2 i serieopninga i vår. Vi brukte ti kampar på å ta dette igjen. Denne litt tøffe starten på hausten bli svært viktig for oss.

Mister éin spelar

Før sommaren mista Os keeper Frode Moberg Øvredal, som er erstatta av Chris Sunde Midtun. Midtstoppar Divaldo Cardoso fekk lov å gå tilbake til Øystese.

– Førebels ligg det ikkje an til at vi ber om å få Cardoso igjen, men får vi skade i forsvarsrekka før overgangsvindauget stenger, så må vi nok det.

Til no ligg det an til at Os mister éin spelar før hausten set inn.

– Steffen Ljosheim reiser vekk på skule.

Frode Storebø, som er ny på Os, har slite med skade og spelt lite. No er austevollingen ferdig utdanna og har fått jobb på båt.

– Han er med oss vidare, i den grad han er skadefri og har tid, men vi får nok ikkje så mykje glede av han som vi først hadde sett for oss.

– Det er likevel ikkje behov for å styrka stallen, med mindre noko spesielt dukkar opp. Vi er godt bemanna og har vore ganske heldige med få skadar i vår. Dei gongane folk har vore skadd har andre steppa opp og gjort god figur!