Konfliktrådet i gang igjen

• Midtsiden startar utsending av gratis nyheitsbrev på epost - meld deg på her

All meklingsaktivitet i landets konfliktråd blei stansa då koronarestriksjonane blei innførte. I dag tar dei opp meklingsaktiviteten igjen - via telefon og video.

– Vi er glade for å koma i gang igjen i denne krevjande tida, kor konfliktar lett kan oppstå, seier leiar i Konfliktrådet Vest, Bjørg Sletten.

I fjor var det i alt 14 straffesaker, 5 sivile saker og 3 ungdomssaker i Os. I 2020 har det til no, i Bjørnafjorden kommune, vore ingen straffesaker, men 2 sivile saker og 1 ungdomssak.

Konfliktrådet tilrettelegg for møter sånn at dei som har ein konflikt kan løysa denne saman, og kanskje finna ei løysing som begge kan godta. Tenesta er gratis.

– Viktig å finna ein måte å koma i gang igjen

Tida med stengte kontor har vore brukt til å sikra gode rutinar for partar og meklarar for møte over telefon eller video på nett.

– Det var viktig å raskt kunna tilby alternative meklingsmøte som kan fungera godt i løpet av denne unntakstilstanden. Vi veit ikkje kor lenge den vil vara.

– Ikkje alle typar saker vil eigna seg for møte via telefon eller nett. Dei kan berre gjennomførast om begge partar aksepterer løysinga, seier Sletten.

Alternativet er å venta til koronasituasjonen har endra seg.

Merker behovet

Konfliktrådet i Vest har 9 tilsette og 40 meklarar. I Vest er det to kontor, eit i Førde og eit i Bergen.

I tråd med Helsedirektoratet sine anbefalingar for å begrensa smittefare vil alle Konfliktrådet sine kontor framleis vera stengde. Dei tilsette har heimekontor.

– Vi erfarer at mange har behov for å høyra om det vanskelege dei står i kan eigna seg for konfliktrådet. Telefonlinjene våre er opne og vi tar imot saker som før, både frå publikum og politiet.