Kong Sverre

Denne helga har Norgesmeisterskapen i skøyter enkeltdistanser blitt arrangert i Sørmarka Arena i Stavanger.

Sverre Lunde Pedersen viste at formen er inne etter å ha vunne 5000 meter med 6.22,40, 1500 meter med 1.47,19 og 10.000 meter med 13.18.40.

– 1500 meteren blei rekordjamn og det skilte berre 14 hundredeler mellom første og fjerdeplass. Det tilsvarer eit svært kort fingerknips og er den jamnaste 1500 meteren i NM i historia, seier Halvor Lauvstad, generalsekretær i Norges Skøyteforbund.

Generalsekretæren gler seg over at Noreg får eit fryktinngytande lag på mellomdistanse og lagtempo på skøyter i år.

– Våre fire beste løpere er ein miks av enorm rutine, ungdommeleg pågangsmot og enorm sult og vinnervilje, seier Laupstad.

Dei fire som det skilte berre fjorten hundredel mellom var Sverre Lunde Pedersen (1.47.19), Sindre Henriksen (1.47.22), Allan Dahl Johansson (1.47.30) og Håvard Bøkko (1.47.33).

Ny meisterskapsrekord og kongepokal

Sverre Lunde Pedersen avslutta NM med gull på 10.000 meter og ny meisterskapsrekord med tida 13.18.40. Sølvet gjekk til den gamle rekordinnehavaren Håvard Bøkko, som kom inn på 13.30.03.

– Eg føler eg har mykje meir energi og overskot i kroppen. Det er deileg å føle etter ein tung sesong i fjor, oppsummerte Lunde Pedersen til BT etter helga.

Han innrømmer at han er litt overraska at det også skulle bli kongepokal etter helga i Stavanger.

Om 10.000 meteren og kongepokalen fortel han om eit godt løp.

– Eg hadde god kontroll og prøvde å auke litt på slutten, men kjende at det har vore ei tøff helg. Så blei det også banerekord og kongepokal. Den trudde eg Håvard Lorentzen skulle ta, men dei sa at 10.000-meteren avgjorde.

14 dager til verdscupen

Ikkje overraskande er Lunde Pedersen teke ut til sesongens to første verdscupar på Skøyter i Heerenveen 10.-12. november og på "heimebane" i Stavanger helga etter.

– Konkurransane vil vera viktige for å kunna kvalifisere seg til OL i februar 2018, seier Lauvstad.