Kontroll på Halhjemsvegen

Tysdag kveld hadde utrykningspolitiet fartskontroll på E39 Halhjemsvegen.

Dei sto på vekta på Moberg og sjekka farten på trafikken retning sør.

– Vi har stoppa to til no, sa UP til Midtsiden i 19.30-tida.

Høgaste fart var 89 km/t i 70-sona, noko som resulterer i 5000 kroner i forelegg og to prikkar på førarkortet.

UP har etter kontroll ikkje sendt inn komplett rapport i systemet Bjørnafjorden lensmannskontor bruker.

Tatt med breie hjul - igjen

Onsdag kontrollerte politiet ein bil i Os sentrum. Bilførar har tidlegare i vinter fått pålegg om å visa bilen fram for vegvesnet etter at han køyrde med for breie hjul.

– Det hadde han gjort. Bilførar, ein ung mann, hadde tatt smalare dekk og vist bilen for vegvesenet. Men så hadde han tatt på dei breie igjen, fortel politioverbetjent Anne Lyssand.

Dermed blei det skrive ny kontrollseddel. No må bilen inn på full teknisk sjekk.

Avskilta lastebil og hengar

I 06.30-tida onsdag morgon kom patruljen forbi ein parkert lastebil med hengar, som dei tok ein nærmare titt på.

– Lastebilen er ikkje EU-godkjent og hadde berre skilt framme. Hengaren er ikkje omregistrert, og hadde nokre grove tekniske manglar.

– Både bil og hengar blei avskilta.