Kor varmt er det i vatnet?

Bildeserie:

1 av 5

Med nær tredve grader i lufta er det mange som lar seg frista av å hoppa ut i Bjørnafjorden eller i eitt av ferskvanna i Os.

Midtsiden tok tysdag formiddag ei runde på til fem av badeplassane i Os for å måle kva temperaturen eigentleg er i vatnet.

Vi valde oss tre plassar i saltvatn og to ferskvatn.

• Mobergsvikjo, Os sentrum (ved stupebrettet): 16 grader
• Haugsneset, Os sentrum (i enden av baderampen): 16 grader
• Søvikvågen, Lysefjorden (ved stupebrettet): 17 grader
• Sigurdsvikjo, Ulvenvatnet (ved brygga): 20 grader
• Vinddalsvatnet, Søfteland (utanfor steinane): 20 grader

Målinga er fortatt med eit enkelt badetermometer omlag 20 cm under vassoverflata. Vi lot termometeret ligga i fem minutt for rettest mogleg resultat. Djupna på vatnet varierte noko på plassane, men var aldri mindre enn ein halv meter.

Kjem i løpet av eit par dagar

På vår rundttur møtte vi Hege Christine Bolstad frå teknisk eining i Os kommune som var ute i same ærend. I tillegg til temperaturane tek ho også vassprøver som blir analysert for såkalla termostabile koliforme bakteriar (TKB).

Dette er tarmbakteriar frå menneskje og dyr som ikkje overlever lenge i naturen. Difor er TKB-prøvar ein god indikator på fersk forureining.

– Eg reknar med at vi vil ha prøvene klare i løpet av eit par dagar. Då vil desse bli publisert på Os kommune si heimeside, fortalde Bolstad.

Her finn du Os kommune sine offisielle målingar av temperatur og vasskvalitet når analysane er klare.