Koronaviruset: Råd til innbyggarane i Bjørnafjorden

Søndag kveld kom Bjørnafjorden kommune med råd til barnehagar og skular i kommunen, før første dag etter vinterferien.

Her er råda frå kommuneoverlege i Bjørnafjorden kommune, Klaus Melf, ifølgje kommunen sine heimesider.

God hand- og hostehygiene er det viktigaste!

Dette understrekar kommuneoverlege i Bjørnafjorden kommune, Klaus Melf. Å sørgja for god og hyppig handvask, reduserer risikoen for å bli smitta av ei rekke smittestoff, blant anna influensa- og koronavirus.

I tillegg er det viktig at den som hostar eller nys, bruker papirlommetørkle, kastar det og vaskar hendene etterpå. Olbogekroken er ei nødløysing, dersom papirtørkle ikkje er tilgjengeleg.

Feber eller teikn på luftvegsinfeksjon?

Har du fått feber, sår hals, hoste og/eller pustevanskar, så er det mest sannsynleg ein vanleg luftvegsinfeksjon eller sesonginfluensa.

Då skal du ikkje gå på jobb, skule eller barnehage, men halda deg heime til du er symptomfri, som vanleg ved sesonginfluensa.

Du treng ikkje ta kontakt med fastlege/legevakt dersom du ikkje er veldig sjuk.

Tilbake frå område med vedvarande spreiing av koronasmitte?

Det er ikkje nødvendig med heimekarantene etter at du kjem heim frå område med vedvarande spreiing av koronaviruset, sjå Folkehelseinstituttet si nettside for kva område dette gjeld.

Men det er viktig at du følgjer med på om du eventuelt utviklar teikn på luftvegsinfeksjon dei neste 14 dagane.

Dersom du får feber og luftvegssymptom, hald deg i heimekarantene og ta kontakt på telefon med fastlegen, eventuelt legevakt (116117) for prøvetaking.

Har du vore i nærkontakt med person som har fått bekrefta koronasmitte?

Dersom du har vore i nærkontakt med ein eller fleire personar som har fått bekrefta koronasmitte, må du halda deg i heimekarantene i 14 dagar.

Nærkontakt vil seia kontakt ansikt til ansikt, eller ved handhelsing. Smitta husstandsmedlemmer blir rekna som nærkontakt.

Dersom du sjølv blir sjuk, ta kontakt på telefon med fastlegen, eventuelt legevakt (116117) for prøvetaking.

Skular og barnehagar

Barnehagebarn og elevar utan symptom, skal gå i barnehagen/på skulen som vanleg. Unntak er dei som har vore i nærkontakt med personar med bekrefta koronasmitte.

Det blir sendt eit eige skriv til føresette med heim måndag 2. mars.

Du kan lesa meir om både koronaviruset, råd for korleis du kan unngå smitte, og kva du skal gjera om du trur du er smitta på Folkehelseinstituttet (FHI) sine heimesider.