Kort veg frå utplassering til fagbrev

Vestmekaniske AS blei starta i 2015, og har raskt vakse frå 3,6 til 14,8 millionar i omsetnad (2017).

• Videoreportasje: På innsio: Vestmekaniske (november 2015)

To elevar utplasserte frå Fusa vgs gjorde at dei raskt også blei lærebedrift.

– Eg har jobba i bransjen i 30 år, men aldri hatt lærlingar før. Men vi var heldige og fekk nokre gode kandidatar i utplassering, og tenkte kvifor ikkje, seier medeigar Tom Fagerthun.

Det angrar han ikkje på.

– Ungdomane har vore lærevillige, flittige og sjølvstendige. No har førstemann, Kim Thorsvik, fått fagbrev som industrimekaniker. Også neste år har vi ein lærling som skal opp til svenneprøve.

– Ein snakkis heile skuleåret

Vestmekaniske blei starta året etter at oljekrisa starta.

• Les òg: Gahr Støre besøkte Vestmekaniske (2017)

Dette påverka også elevane sine utsikter til å få læreplass.

– Dette med læreplass var noko vi snakka om gjennom heile skuleåret, fortel Kim.

Då han fekk fem veker utplassert hos nystarta Vestmekaniske, fekk han òg jobb på kveld og helg. Så spurde han om ikkje dei ville bli lærebedrift.

– Eg er veldig glade for at dei tok seg bryet. Ikkje berre fekk eg læreplass og fagbrev, eg har fått gode kollegaer og varierte arbeidsoppgåver. Då eg skulle opp til svenneprøve hadde eg erfaring innan alt eg trengte.

Veks vidare i år

Thorsvik går no inn som ein av 16-17 tilsette i selskapet.

– Veksta har halde fram i år, seier Fagerthun.

Bedrifta har to avdelingar, éi i Hegglandsdalen og éi i Kolskogen.

Dei største kundane kjem frå oppdrettsbransjen, offshore, møbelbransjen og byggebransjen - med fleire store, lokale kundar, blant anna som underleverandør til ein av dei nærmaste naboane, Johs Sælen & Sønn AS.