Køyrde i fjellveggen på Lepsøy

Laurdag klokka 22.41 kom det melding om bil i fjellveggen på Lepsøyvegen. Førar av første bil på staden meldte ifrå.

Politi, ambulanse og brannvesen var raskt på staden.

– Det ser ut til å vera berre denne eine bilen involvert. Det er førebels uvisst kva som er årsak til ulykka, fortel politibetjent Robert Jacobsen.

Bilførar, ei ung kvinne, var åleine i bilen.

– Ho var bevisst då redningspersonell kom til staden. Airbagane i bilen var løyst ut.

OPPDATERT: Det blei tatt beslag i førarkortet til kvinna, som er i starten på 20-åra.

Kvinna blei kontrollert av helsepersonell på staden, og køyrd vidare til legevakt for sjekk.

Ulykka skjedde mellom Garvikasvingen og Mørkevågen.

Trafikken gjekk forbi ulykkesstaden i starten, men blei blokkert mens redningsarbeidet pågjekk.

– Det var ikkje oljesøl på staden. Det eine hjulet var punktert, så bilen var vanskelig å skubba, fortel varabrannsjef Erik Walden.

Brannvesenet brukte vinsj og fekk den ut av vegbanen.