Køyrde i mur og stakk frå staden

Bildeserie:

1 av 4

Ein bil har kollidert med ein mur utanfor Hagavik Hjemmebakeri. Politi, brannvesen, lege og ambulanse rykte ut til staden.

– Ingen er fastklemt, opplyser 110-sentralen via Twitter.

Midtsiden har ikkje lykkast i å nå politiet, men har hatt dialog med to vitne på staden.

– Ingen ser skadd ut. Bilførar skal ha stukke frå staden, mens ei jente som var passasjer er igjen ved bilen. Eg høyrer snakk om at politiet framleis ikkje har funne bilførar, og at dei no ventar på hundeførar, seier Tore Øvreeide.

Han kom til staden i 11-tida, kort tid etter samanstøyten.

Av bremsespor ser vi at bilen kom frå Skeisflaten og køyrde på feil side av refuga opp mot Lepsøyvegen. Det ser ikkje ut som om andre bilar er involverte.

OPPDATERT kl 15.30: Bilførar blei funnen rundt klokka 15.

– Han blei funnen på ei adresse. Det kan sjå ut som om det er heimeadressa hans, seier operasjonsleiar Steinar Hausvik.

Mistenkte er ein mann i 20-åra. Han blir tatt med for prøvetaking, men politiet har foreløpig ikkje svar på om han er mistenkt for køyring i rus - eller om han har førarkort frå før.

OPPDATERT kl 19.30: Midtsiden har vore i kontakt med bileigar. Han opplyser at bilen var stolen.

Bildeserie under er synleg for innlogga abonnentar.