Kristian (14) debuterer i bilcross

Bildeserie:

1 av 5

Laurdag har NMK Bergen klubbmeisterskap på Eikås. Dette blir Karoline Breivik (18), som i år debuterte i rallycross med samanlagsølv i junior-NM, sitt siste løp i år.

Men det blir samtidig brorer Kristian, som fyller 15 år seinare i oktober, sitt første løp.

Også osingen Jarle Nytræ, som i år har kjøpt seg to rallybilar, vil sjølv bak rattet og debuterer i morgon som Karoline sin einaste konkurrent i rallyklassen.

– Dei lurte meg

Det er drygt tre år sidan rallyførar Håvard Gåssand kjøpte bilcross-bil til barnebarnet Karoline i konfirmasjonsgåve.

Veslebror Kristian har også vakse opp som rallytilskodar, og det siste året tatt initiativ til å koma seg bak rattet, blant anna ved å ta lisenskurs i mars i år.

Sjølv om eg veit at besteforeldre ofte liker å behandla barnebarn likt, hadde han ikkje venta å få bil i gåve, slik storesøstra fekk.

– For det første hadde vi snakka om å kjøpa bil etter konfirmasjonen, for det andre blei det av enkelte i familien hinta om at eg skulle få moped, fortel Kristian.

Men rett før middagen blei servert trilla morfar og mormor Håvard og Randi inn på tunet med bilen, ein Golf III rigga for bilcross. Bilen liknar Karoline sin første, ein Golf II som ho framleis bruker til bilcross i enkelte løp.

God trening

Mai var ikkje omme før Kristian var på første trening med den nye bilen, og han har fått fleire gode treningsøkter og nokre få testløp med start éin og éin.

– I morgon blir min første fellesstart og mitt første skikkelege løp. Eg gler meg veldig.

Morfar fortel at han ser same talentet hos Kristian som hos Karoline.

– Dei kjører jamt, og det betyr mykje. Spinning og sladding er tapt tid, sjølv om du under trening skal testa grensene er dette med å ha disiplin og halda passe høg fart i runde etter runde ein veldig god eigenskap.

Vil kjøra VM-runde neste år

Jarle Nytræ, som i første omgang har kasta seg på rallysirkuset ved å kjøpa bilar for å leiga sjåfør eller for å leiga vekk bilane, vil sjølv bak rattet.

– Både eg og kona Maren har tatt lisenskurs. Målet mitt er å få kjørt ein VM-runde neste år, men først må eg ha nokre nasjonale løp for å få internasjonal lisens.

– Kva tenker du om at du har éin konkurrent i morgon, 18 år gamle Karoline?

– Eg synest det er veldig kjekt for sporten og for Os at ho har byrja med bilcross og seinare rallycross.

– Eg har respekt for det ho har fått til, men sjølv om eg er debutat så har eg nokre fleire år bak rattet på vanleg veg, tre gongar så stor motor og firehjulstrekk, så eg bør slå ho i morgon, seier Jarle.