Kva med ungdomen?

Debatten var god og engasjementet var høgt i vår då eit innlegg på Oppslagstavlo for Os på Facebook varsla om ungdom på rek i sentrum.

Siste noterte handling i saka var eit møte i det gamle kommunehuset kor kommunen hadde invitert politikarar, administrasjon, politi, kyrkje, skule, elevråda på ungdomsskulen, ungdomsrådet i Fusa og ungdomsklubben på Radøy for å diskutera status for ungdomsarbeidet i Os.

Bak skjema, men på saka

Nils-Anders Nøttseter (MDG) hadde i møtet tysdag følgjande spørsmål til administrasjonen:

– Kan formannskapet få ei oppdatering på korleis det går med satsing på ungdom?

Kommunalsjef for oppvekst og kultur, Line Rye, kunne fortelja at kommunen har delt saka opp i to punkt;

– Først av alt vil vi ha ungdomen i tale. Det kom tydeleg fram på møtet vi hadde i april at ungdomen ønskjer å verta høyrt.

– Samstundes ønskjer vi å få etablert eit felles ungdomsråd med Fusa. Dette vil etterkvart fungera som eit ungdomsråd for Bjørnafjorden kommune.

Rye kunne fortelja at på det første punktet var kommunen forseinka.

– Dette skuldast i all hovudsak kapasitetsutfordringar på oppvekst, men eg kan leggja til at SLT-koordinatoren som no er på plass, kjem òg til å vera med på på eitt elevrådsmøte for å få innspel. I første omgang på ungdomsskulane, men vi kjem til å vurdera å inkludera dei vidaregåande skulane òg.

– Vi ser òg på korleis MOT-arbeidet kan nyttast i denne samanhengen, la Rye til.

Ungdomsråd kjem

Rye kunne vidare fortelja formannskapet at det ligg ein heilt klar invitasjon frå kulturkontoret i Fusa, som er ansvarleg for ungdomsrådet i Fusa, om eit samarbeid.

Nøttseter ville då gjerne veta kor tid kommunalsjefen såg føre seg at eit ungdomsråd i Os/ Bjørnafjorden kunne vera oppe å gå.

– Vi har sete oss eit reelt mål om at dette skal vera på plass til skuleåret 2019-20 startar, svara Rye.

– Det er godt å høyra om framdrift i saka, svara Nøttseter, men den må samstundes vera reell, la han til.