Niklas Linde er nettopp tilbake i trening etter skadeopphald, og er ikkje med mot Søre Neset. Men det er Simon Aasen (t.h.), som skåra fire mål i førre kamp. (Arkivfoto: Henrik Mjelva)

Kven er favoritt?

Søfteland-spelarane er ikkje nøgd med favorittstempelet Søre Neset-trenaren har gitt dei før måndagens derby på Stilvoll.

Av: Kjetil Vasby Bruarøy

Måndag er det lokaloppgjer mellom to av dei fire beste laga i 6. divisjon avdeling 1, Søfteland tar imot Søre Neset til derby på Stilvoll.

– Det blei nokre kommentarar på trening etter notisen i Os & Fusaposten onsdag, seier Søfteland-spelar Simon Aasen.

Sjølv skåra han 4 av Søfteland sine 10 mål då dei slo Vestkysten 10-1 borte i førre runde. Søre Neset spelte måndag 1-1 heime mot Løvstakken 2.

– Men Søre Neset var også suverene då dei spelte mot Vestkysten, 8-0 er ikkje langt bak 10-1.

– Vi liker å vera underdogs og vil ikkje ha favorittstempel på oss før lokaloppgjeret. Men vi gler oss til å møta på Søre Neset-spelarane og Svenningsen, seier Aasen.

– Held meg til fakta

Søre Neset-trenar Kenneth Svenningsen, som trente Søfteland i fjor, er sportsjournalist i Os & Fusaposten. I ein notis onsdag skreiv han om førre runde og meiner Søfteland bør finna seg i å vera favorittar før lokaloppgjeret.

– Det var nok skrive litt i affekt, etter at vi skapte over 25 sjansar og berre putta eitt mål i vår eigen heimekamp, ler Svenningsen.

– Men eg held meg til fakta når eg skriv at Søfteland er favorittar, dei ligg eitt poeng bak oss på éin kamp mindre spelt, og har betre målforskjell.

– Eg kjenner Søfteland godt og veit at dei både er gode, at dei har ein god porsjon vinnarvilje og at dei er sterke på heimebane.

 – Søre Neset har mange gode spelarar, men vi må jobba med å omsetja sjansar til mål.

Søfteland – Søre Neset startar klokka 19.00 måndag.

SJÅ TABELL

 

Fleire saker