Kvinne kasta iskaffi på politiet

Måndag klokka 13.34 fekk politiet melding om merkeleg åtferd utanfor eit kontor i Os sentrum.

– Ein mann og ei kvinne skal ha hengt noko stoff på utsida av døra og tent på, fortel politioverbetjent Anne Lyssand.

Det var ikkje fare for brann, og brannvesenet blei heller ikkje tilkalla, men på staden møtte politiet to personar dei kjenner frå tidlegare forhold. Begge framsto som rusa.

– Det kan av loggen sjå ut som om mannen, som er i 30-åra, fekk forelegg. Kvinna, som er i 20-åra, var aggressiv, og kasta iskaffi på politiet.

Ho blei køyrd til arresten i Bergen og er meldt for forulemping av offentleg tenesteperson.

Mann i 40-åra fekk «husarrest»

I 15.30-tida i går fekk politiet melding om svært rusa mann som gjekk midt i vegen.

Politiet møtte vedkomande, men då hadde han kome seg heim.

Patruljen frykta at han var til fare for seg sjølv, så han fekk pålegg om å halda seg heime.

Klatrar og hoppar frå tak til tak

Måndag ettermiddag blei politiet kontakta av ein turgåar som fortalte om elevar som er tilbake på skulen i vinterferien - ikkje for å lesa, men for å klatra på tak på skulebygningane til Os barneskule.

– Det er uvisst om dette var ein fersk observasjon, altså på dagtid, men vedkomande ba oss følgja med i området både dag og kveld, så ingen skulle skada seg.