Klokka 03.20 natt til laurdag blei ei kvinne i slutten av 20-åra stoppa på Byvegen ved Amfisenteret, mistenkt for promillekjøring.
– Alkometeret gav utslag og kvinna blei tatt med til blodprøvetaking, opplyser politiet.
Ein knapp time seinare oppdaga politiet at ein mann låg og søv på bussterminalen i Os sentrum.
– Mannen, som er i 20-åra, blei kjørt heim til foreldra sine.
Midt i vegen – i 70-sona
I 2-tida fekk politiet melding om at det gjekk ein rusa mann, midt i vegen på Hetleflåten, med ein kniv i handa.
– Det viste seg at det ikkje var ein kniv, men ei mercedes-stjerne.
Det er uvisst kvar stjerna kom frå, men mannen, som er ein kjenning av politiet, blei kjørt heim.
Festbråk, oljesøl og lause hestar
Fredag kveld og natt til laurdag fekk politiet også melding om lause hestar ved Bjørnefjorden Gjestetun, samahengande oljesøl frå Søfteland til Nesttun og festbråk på Lepsøy.
– Festen på Lepsøy var i ferd med å bli avslutta då vi kom til staden. Vegtrafikksentralen fekk melding om oljesølet og hestane på Hauge fann vi ikkje, så dei reknar vi med raskt blei tatt hand om av eigar.