Kvinne tatt for nasking
Politiet fekk torsdag melding om støy på Skorvane, nasking på AMFI Os og utlendingar som vil vaska taka til folk, og måtte sjølv stilla opp for å avliva ein fugleunge.
I tillegg til utforkjøringa i natt kan politiet fortelja om desse sakene:
– Vi fekk melding om støy frå fest på Skorvane i natt, der det blei spelt høg musikk i hus med opne vindauge. Patruljen var ikkje ute på adressa, men det kom heller ikkje fleire meldingar, seier politioverbetjent Terje Sperrevik.
Åtvarar mot å kjøpa svart arbeid
Politiet har også fått melding om utledningar som går frå hus til hus i Os, og andre stadar i distriktet, der dei tilbyr å vaska taka til folk.
– Vi vil koma med ei generell oppmoding om å vera varsam med å bestilla tenester av selskap der det er usikkert om dei driv lovleg verksemd, seier Sperrevik.
Det er ikkje lenge sidan Skatt Vest og Arbeidstilsynet slo til mot svart arbeid i Os.
Der fortalte Skatt Vest om risiko for at du som kjøpar av svarte tenester, om du betalar kontant meir enn 10.000 kroner, kan bli halden ansvarleg for å dekka offentlege utgifter som selskapet, om det driv ulovleg, skuldar statskassen.
Nasking og avliving
Ei kvinne blei torsdag meldt for nasking på AMFI Os.
Ei anna kvinne meldte frå om funn av ein skjor-unge som hadde ramla ut av reiret.
– Ho hadde ingen naboar som ville hjelpa med avliving og veterinær kunne ikkje ta oppgåva, så då rykte vi ut og tok hand om fuglen.
For breie dekk
Ein bilførar som blei stoppa på Halhjemsvegen i 22-tida i går fekk pålegg om tekniske utbetringar.
– Han hadde blant anna for breie dekk på bilen, og fekk pålegg om å koma til oss og visa bilen i betre stand innan ein viss frist.