Lading medan ein køyrer på nye E39?

Ein artikkel i Teknisk ukeblad hevdar at 1100 km på E39 mellom Kristiansand og Trondheim skal få induktiv lading.

Kjersti Kvalheim Dunham som er prosjektleiar for ferjefri E39 i Statens vegvesen, seier dette litt mer forsiktig;

– Vi har eit prosjekt på gang - eit forskningsprosjekt - der vi ser på moglegheitene for induktiv lading.

– Dette er berre ein av fleire ting. Vi ser på moglegheitene kring hausting av energi, korleis ein kan spara energi, og om det er mogleg å lada bilar undervegs, seier Dunham.

I kompaniskap med svenskane

I Sverige er dei komne ganske langt i forhold til Norge når det gjeld elektrisk lading undervegs, og vi er med i prosjekta deira, kan Dunham fortelja.

– Dei har bygd ut nokre stekningar med ein ny type teknologi. Ei elektrifisering av vegen, som ein kan kalla det det. Det er fleire måtar å løyse dette på.

- I Sverige er Svenske Trafikkvärket og Volvo kome langt i prosessen. Dei har omlag som eit «trikkesystem», der det heng kablar over vegbana som lastebilar koplar seg på gjennom kabel på taket. Då lader ein gjennom desse staumførande linjene. Ei anna løysing kan vera å ha skinne i vegbana som ein kan kobla seg på med kabel under bilane.

Induktiv løysing

– Ei tredje løysing er det som vi no kallar induktiv lading, men det er ein annan type teknologi. Men den er meir fleksibel, og det skjer veldig mykje spennande på det feltet no. Resultata kjem fort.

– Dersom ei vegstrekning kan produsera meir energi enn den brukar, vil ein kanskje kunne drifta vifter i tuneller, pumper og lys med denne energien. Og kanskje også, dersom det er overskot, lada bilar.

– Men dette krev jo ikkje berre investeringar i sjølve vegen, men også i bilane. Det er ingen vits i å bygga induktiv lading dersom ikkje bilane kan ta imot det.

– Men her er ein heilt avhengige av å finna løysingar i samarbeid med el-bransjen. Det er spennande tankar å tenkje på energiproduksjon opp mot vegbygging. Her kan ein ta inn både vind- og bølgjekraft også kombinert med fjordkryssingane, og solceller integrert i vegskjeringar og støyskjermar.

Fleire forskningsprosjekt

Dunham fortel at Statens vegvesen saman med Sintef og NTNU arbeider med forskningsprosjekt knytt opp til denne type teknologi.

– Der er både eit prosjekt som heiter «ELINGO», og eit som heiter «PowerRoad». Det førstnemnde fokuserar på løysingar for dynamisk induktiv lading som blir integrert i vegbana.

– Det er førebels litt for tidleg å seia noko om nye E39 mellom Os og Bergen får implementert dette i byggjefasen. Teknologien må utviklast så langt at den blir praktisk.

Pilotstrekningar

Dunham fortel at Rogfast-prosjektet i Rogaland kanskje er dei som er mest «på» i forhold til nye, gode klimavenlege løysingar.

– Rogfast-prosjektet har lenge hatt fokus på dette med energi. På Os-Bergen har det ikkje vore så mykje førebels.

– Dersom Lyseparken næringspark, knytt opp til nye E39, får ein grøn profil, vil det tala for at Os-Bergen kan koma høgt på lista over aktuelle pilot-strekningar?

– Det er umogleg å svara på. Vi veit ikkje når teknologien er komen så langt at vi kan starta på test-strekningar.

– Kan lokalt engasjement bidra til at slik teknologi vert utprøvd her?

– Det eg kan seia er at aktuelle pilotstrekningar er enklare å gjennomføra dersom det er eit lokalt engasjement!

– Ellers kan eg avslutningsvis seie at vi jobbar med dette, teknologien går stadig framover, og ulike E39 strekningar kan vera aktuelle som pilotstrekningar.