Lager gatemarknad på Øyro
Over 30 utstillarar: Frå vaflar og strikkevarer til kunst og lopper - laurdag samlar ein gjeng frivillige seg om å laga gatemarknad på Os.
Det starta med initiativ i januar frå ei dame frå Fana, Turid S. Mjåtveit, og så balla det på seg.
– Mange viste interesse for å stilla med stand ut og det er eit stort spenn i varekategoriar. Eg elsker marknadar sjølv så eg slengte meg med og vil selja pocketbøker og andre lopper, seier Grethe J. Rein.
Riggar seg til på torget
Ho er ei av dei frå Os som byrja å undersøkja kvar ein sånn marknad kunne arrangerast.
– Først fekk vi goodwill frå Os Kulturutvikling på å låna Vognhallen, men så spreidde ryktet seg til Os sentrum, og der insisterte dei på at vi måtte koma inn på Øyro med gatemarknaden.
Over 30 utstillarar
Førstkomande laurdag blir første runde med gatemarknaden, og torget (framfor Libris) og Telthusplassen (bak Bakketeig) blir omdanna til marknadsplass.
– Per no har vi 32 utstillarar. Varene varierer frå mat, som vaflar, vårrullar, sukkerspinn og popcorn, til heimelaga handarbeid, kunst og brukte ting.
– No held vi på å førebu oss, blant anna ved å låna oss telt. Heldigvis er det gode meldingar for laurdag, så vi slepp truleg å bli våte, seier Grethe Rein med eit stort smil.
Marknaden er open frå 11 til 15. Kanskje blir det også utstillarar frå eksisterande butikkar i Os.