Laila Reiertsen er innstilt som varaordførar

Med Søviknes sin permisjon i samband med statsrådposten, som skal innvilgast i ekstraordinært kommunestyremøte torsdag, rykker Marie Lunde Bruarøy (H) opp som ordførar.

Kven som steppar inn som varaordførar var ikkje bestemt då vi snakka med formann Gustav Bahus i førre veke, Frp kjem no med innstillinga si etter gruppemøte i formannskapssalen søndag kveld.

Der blei Laila Marie Reiertsen samrøystes innstilt som ny varaordførar.

Med Gjermund Hagesæter sin retur frå regjering til storting i desember blei det slutt for Reiertsen sitt vikariat på tinget, og ho er tilbake i Os.

• Les òg: Reiser til Oslo for å pakka

– Då vi var einige om å gå for opprykksmodell, i staden for å køyra val, blei kabalen samrøystes vedtatt, seier leiar i Os Frp, Gustav Bahus.

Nytt medlem i formannskapet

For å vera aktuell som varaordførar må vedkomande sitja i Os formannskap. Saman med Laila, frå Frp, sit Jonn Garvik, mens Eirik André Hesthammer er 1. vara og stepper inn i Søviknes sitt fråvær.

– Jonn signaliserte at han ikkje følte seg erfaren nok til å stilla ved eit eventuelt val til varaordførarvervet, seier Bahus.

Gustav Bahus, som er leiar for plan- og bygg, er 2. vara i formannskapet.

Når Laila rykker opp som varaordførar går Eirik André Hesthammer, som frå før er medlem i tenesteutvalet, inn som fast medlem av formannskapet, mens Bahus blir første vara og Marianne Neumann Hjelle rykker opp som andre vara.

Espen Aspenes er innstilt som ny 3. vara i formannskapet.