Legg ned butikken

Strønen Fargeservice har travle dagar ute i felten, men i butikken er det stille.

Kjetil Vasby Bruarøyonsdag 09. feb. 2011 11:39

Strønen Fargeservice har redusert opningstidene og har planar om å legga ned butikken i Landboden. Janne Sørstrønen, som har selt maling i 25 år, er på jakt etter ny jobb.

- Det har vore veldig spennande å jobba med maling og interiør, med mykje nytt heile vegen og mange kjekke kundar. Eg held gjerne fram i bransjen, seier Janne.

Full fart - men berre i felten
Mesteparten av butikktida hennar har vore for Arne Strønen i Handlegården. Men etter at Fyllingen Gulv og Malerservice AS kjøpte firmaet og flytta butikken til Landboden skal ikkje grunnlaget ha vore godt nok for vidare drift.

- Vi har veldig god drift på tenestene våre frå Arne Strønen AS, med sju mann i full sving, men eg trur ikkje butikken ligg på rett stad, så vi legg truleg ned til sommaren, seier innehavar av holdingsselskapet, Espen Johnsen.

Han trur overskotet i 2010, som landar på rundt 1,5 millionar kroner, kunne vore nærmare 2 millionar kroner om ikkje dei hadde butikken å driva.

Blir lager
Med lang fartstid har Sørstrønen seks månadar lang oppseiingstid. Derfor vil Johnsen styra stenginga litt etter hennar jakt etter ny jobb.

- Leigekontrakten på lokalet er på tre år, så vi kjem til å flytta golv- og fliselageret vårt frå Kolskogen til Landboden når butikken stenger. Og vi kan skaffa maling frå lageret, til private kundar også, sjølv om lokalet snart er utan faste opningstidene, seier Johnsen.

I lokalet, der Malermester Hjelle dreiv butikk i mange år, er det allereie reduserte opningstider. Strønen Fargeservice har no berre ope måndag, onsdag og fredag.