Lei av kø bak store bilar
– Buss møter vogntog og der står vi. Det skjer stadig oftare, seier pendlar frå Os. Ho håper på ei endring, men den ser ikkje ut til å koma.
Ein Midtsiden-lesar har sendt oss bilde av noko ho skildrar som ein meir og meir vanleg situasjon på fylkesveg 163 over Fanafjellet.
– I starten trudde eg det var ei ulykke. Trafikken sto bom fast og det blei lang kø.
– Men så var det berre ein buss som hadde møtt eit vogntog og dei to sleit med å passera kvarandre. Til slutt måtte vogntogsjåføren ut og dirigera bussjåføren forbi.
Mindre bussar eller ny klassifisering?
Innsendar, som ikkje vil ha namnet sitt i avisa, fortel om aukande trafikk av store bilar over Fanafjellet med tilhøyrande aukande tilfelle av kø når bussar og lastebilar møter kvarandre.
– Eg håper at det går an å gjera noko, anten å kjøra mindre bussar, setja dei mest erfarne bussjåførane bak rattet på rutene over fjellet eller å senda vogntog andre vegar mellom Os og Bergen, seier ho.
– Busselskapet må no merka det dei òg, det kan ikkje vera lett å halda ruta når dei står så ofte i ro på Fanafjellet.
– Kjenner til problemet
Frå Skyss blir vi sendt vidare til Tide, som leverer busstransporten over Fanafjellet.
– Vegen over Fanfjellet er relativt smal, men ikkje eineståande i fylket. Men vi ser at den kan by på visse utfordringar, særleg når vinteren kjem, seier Kåre Enæs.
– I dei siste åra har vi, som lesaren du fortel om, også opplevd aukande tungtrafikk over fjellet.
Tiltak som å redusera storleik på bussane er ikkje opp til Tide å utføra.
– Vi må kjøra med den storleiken som står i kontrakten. Førebels opplever vi ikkje ruta som så krevjande at vi har spelt inn dette forslaget til Skyss, og Skyss har heller ikkje tatt opp Fanafjellet spesielt.
– Har Tide ei prioritering av ekstra krevjande ruter, at dei mest erfarne førarane får dei teknisk mest vanskelege turane?
– Alle sjåførane våre har god opplæring og skal takla dette godt nok. Møteproblematikk har vi dessutan fleire stadar i fylket, der vegane er smale og trafikken aukande.
Ingen ny klassifisering
Klassifisering av vegen for å hindra vogntog kunne vore eit verkemiddel, men fylkesveg 163 over Fanafjellet står ikkje på agendaen hos vegvesenet heller.
– Vi bur i eit fylke med veldig mange smale og svingete vegar. Det blir jobba med utbetring fleire stadar, men vi har ikkje noko på gang over Fanafjellet, seier Sindre Lillebø frå plan- og forvaltningsseksjonen.
Osingen Gustav Bahus (Frp), leiar for samferdsleutvalet i Hordaland fylkeskommune, trur heller ikkje det kjem tiltak på vegen med det første.
– Det er mogleg at det er noko utbetring av dekke og av møteplassar og lommer, men ikkje noko anna, seier Bahus.
Sjansen er nok også stor for at ny E39 mellom Bergen og Os stikk av med det meste av fokuset dei komande åra.