Likte kontroll
Politiet får skryt for trafikk-kontroll i Lysefjorden. – Det er ikkje ofte vi får så positive tilbakemeldingar på ein kontroll som i Hellebakkane i går, smiler Terje Sperrevik.

Torsdag rigga patrulja frå Os lensmannskontor seg til i Hellebakkane opp mot skulen og idrettparken i Lysefjorden.
– Vi kontrollerte 21 bilar og førarar utan grunn til å reagera mot nokon av dei.
– Det som var spesielt kjekt var dei positive tilbakemeldingane vi fekk frå folk i området på at vi hadde ein kontroll der.
– Denne gongen hadde vi ikkje med oss laser, men det kan vera at vi gjer neste gong, åtvarar politioverbetjent Terje Sperrevik.
– Skremmande dårleg
Riktig så positiv var ikkje meldinga politiet fekk inn i 6-tida fredag morgon.
– Vi fekk melding frå ein bilist om ein bil på veg mot byen.
– Bilen skulle ifølgje meldar vera i skremmande dårleg forfatning.
Den rufsate bilen svingte av Osvegen mot Fana og saka blei meldt vidare til Fana Politistasjon.
– Dei forsøkte å sjekke opp i den, men det er ikkje ført noko i loggen om at dei påtraff den, fortel Sperrevik.
Bråk i nabolag
Patrulja frå lensmannskontoret har òg vore ute i eit nabolag i området ved Flåten.
– Det skal ha vore noko bråk der, men saka blei ordna opp på staden, avsluttar politioverbetjenten.