Livet på færre kvadratmeter

Tekst: Laila Marie Reiertsen (utplassert frå stortinget hos Midtsiden) og Kjetil Vasby Bruarøy

Det er ikkje berre rundt hamna i Os at det blir bygd blokker og mindre husvære, på Halhjem, Skeie og snart fleire hundre på Søfteland og i Lysefjorden, poppar dei opp og salet ser ut til å gå godt.

Men kvar synes dei som har gått frå noko stort til noko mindre? Saknar dei noko? Tok dei steget ned i storleik tidlegare eller seinare enn dei burde? Vi har snakka med dei yngste og eldste i seniorbustadane i Solstrandsvegen på Austre Lurane.

Med aldersgrense

Det blei ein fin seremoni då første byggetrinn av seniorbustadane på Lurane blei overlevert kjøparane i mai 2010. 23 bustadar var innflyttingsklare og alle hadde fått eigarar.

Prosjektet er det einaste Midtsiden kjenner til i Os, til no, som har hatt aldersgrense. Kjøparane måtte vera 55 år for å få lov til å signera kontrakten.

Naboar blei naboar

Judith Rasmussen, som er 91 år, seier ho er eldst i det nye nabolaget. Blant naboane er tidlegare nabo i Midtskogveien, Målfrid Rød.

– Vi var så heldige at vi hadde familie som overtok einebustadane våre. Her har vi det trygt og vi treng ikkje uroa oss for hus og hage som ikkje får vedlikehald.

– Veldig sosialt

Judith og Målfrid har blitt kjent med mange nye menneske etter at dei flytta. Blant dei er Jon Sæter, som flytta frå huset sitt på Bjånes for å bu på mindre flate.

– Ungane mine bur andre plassar i landet og for dei var det ikkje aktuelt å overta.

– Eg var skeptisk i starten, men eg saknar ikkje det gamle huset. Her har vi det veldig sosialt både ute mellom husa og når vi har mange å gå på besøk til.

Frivillig dugnad

For dei som saknar hagearbeid, eller som vil tena nokre kroner, finnest det oppgåver også utanfor seniorbustadane.

Huseigarane har samla seg og diskutert om dei skal spleisa på vaktmeister, men til no har det ikkje vore naudsynt. Dei betalar heller inn nokre kroner i ein pott som går ut igjen til dei som jobbar, og dei er det mange av, dei eldre held anlegget ved like sjølv.

Innandørs får dei som ønskjer det hjelp frå den kommunale heimehjelpa.

Også for yngre eldre

Blant dei yngre over 55 år som kjøpte på Lurane i 2010 var ekteparet Torunn og Steinar Vangdal.

– Det blei litt på impuls. Vi hadde snakka om å flytta til Bergen då vi blei eldre, men så flytta begge ungane våre heim til Os, så då vi såg annonsen for dette prosjektet gjekk det fort, fortel Torunn.

– Dottera overtok huset og sonen bygde nytt. Torunn og Steinar har 8 barnebarn, og dei har framleis plass til å invitera alle å besøk.

– Vi fekk ein av dei store og har det vi treng på 113 kvadratmeter. Huset heime med 1,2 mål tomt blei opparbeidd i si tid, men det var eit ork å halda.

– Dessutan har vi ei hytte i Hardanger som vi reiser til, og det er endå kjekkare å reisa på hytta når det ikkje er noko heime vi heller skulle brukt helga på å halda ved like.