Lover ny låt og litt lokking
Os Rockeklubb på Rock N LOL: Abstractium vil spela akustisk på Drus Kæmp før dei går på scenen som første band laurdag ettermiddag.
Abstractium, som består av Jan Tore Berven (vokal og gitar), Daniel Hermansen (trommer) og Sander B. Johannessen (gitar), søkjer framleis bassist, men har fått låna Edvard Moe Haugland frå bandet Ondt i Hode til oppdraget på Søfteland Rock N LOL laurdag.
– Vi slepp ei ny låt på laurdag, avslører Daniel Hermansen.
Gode representantar
Bandet, som har deltatt på kulturmønsringa i Os fleire gongar, og spelt på fylkesmønstringa i 2010, er fostra opp i musikkbingen på Kuventræ og seinare i rockeklubben sine lokale i kjellaren i Oshallen.
Dei har også spelt inn fleire låtar i studioet i Allaktivitetshuset. Nokre av dei kan du høyra på Abstractium si facebookside.
– Dette er talentfulle og flittige musikarar, dei har hatt taket på det sidan start og berre blitt betre og betre, meiner leiar i Os Rockeklubb, Kjetil Osablod Grønvigh.
– I fjor stilte klubben med tre band, Bone Shakers, Neoplasma og KingCalling, i år får Abstractium representera oss åleine. Dei kjem nok til å ta seg bra ut saman med resten av årets fantastiske lineup.
– Endeleg 18 år
Abstractium spelte også på Søfteland i 2010. Jobben fekk dei etter å ha spelt akustisk på kunstgalleriet Frode Art i mai same år.
– Den gong var vi ikkje gamle nok til å koma inn i backstage-huset.
– Men Torkjell Rød frå Audrey Horne kom ut og tok ein prat med oss, det var kjekt!
No har dei unge rockarane blitt 18 år og gamle nok til å mingla med dei andre artistane denne kvelden.
Blant dei er banda Abstractium-medlemmane ser mest fram til å høyra denne helga; Audrey Horne og Kvelertak.
Tidleg start på lang fest
Å spela først på ein festival er ikkje alltid mest attraktivt, ikkje alle er klare for å starta festen klokka 17.
– Men sidan vi speler laurdagen, andre festivaldag, og sidan det er så fine vêrmeldingar, reknar vi med at folk er klare for å starta laurdagen tidleg.
– Og for å hjelpa til med å dra publikum i gang vil vi starta litt før, med ein akustisk minikonsert på Drus Kæmp, og dra folk frå vorspiel på camp og opp til scenekanten når vi skal på.
Nytt sidan sist Abstractium spelte på Søfteland er auke frå éin til to scenar. I år speler dei i teltet.
– Det er heilt supert - meir intimt og praktisk med tak om det kjem litt regn laurdag ettermiddag.