Lovleg bålbrenning

Både i går og i dag har brannvesenet fått melding om bålbrenning i Os. Forbodet mot open eld gjeld først frå 15. april.

Kjetil Vasby Bruarøytirsdag 06. apr. 2010 08:35

Måndag fekk brannvesenet melding om røyk frå skogen innanfor Hatvik.

- Dette var eit stykke utanfor allfarveg, så naboane var litt uroa. Vi snakka med grunneigar, som skulle sjekka nærmare. Truleg var det ein som hadde fiska i området som hadde tent bål, fortel brannsjef Stein Gjøsund.

Røyk frå Sveo
Tysdag fekk Midtsiden.no melding om mykje røyk frå området mellom Elvebakken og Flåten.

- Ein som bur på Sveo har i dag varsla at han skal driva bråtebrenning, truleg er det dette bålet røyken kjem frå, seier Gjøsund.

Forbod frå 15. april
Har du planar om å brenna hageavfall eller anna bør du bruka dei neste ni dagane på dette. Frå og med torsdag 15. april er det som vanleg generelt bålforbod i Noreg.

Fram til 15. september er det ikkje lov å brenna bål utan løyve frå den lokale brannsjefen.