Lys i lufta over Tøsdal

Søndag i 16-tida fekk Midtsiden tips om lanterne i lufta over Tøsdal.

Tipsar var avsendaren sjølv: "Til info, i tilfelle folk ringer inn og trur det er UFO", skreiv Bjørn Michelsen i ein sms.

Tilsvarande lanterner er vanleg i Asia, men dukkar med ujamne mellomrom også opp på himmelen over Noreg.

Onsdag i førre veke sto det eit lesarinlegg i Os & Fusaposten, der bussjåfør Frank Tollefsen lurer på kva lys han såg over Røttingen var for noko.

"Det glødet nærmest (...) det så ut som et stort, oransje bål", skriv han.

Kanskje var det ei lanterne av same eller større type.

– Du får kjøpt dei overalt. Vi har handla hos Teknikmagasinet, fortel Michelsen, som saman med to av sonane og ein kamerat som var på besøk, runda av pølsegrilling med å senda ei lanterne i vêret.

Lanterna hang i lufta over Tøsdal ei stund før flammen slokna og lanterna landa nær vegen inn til Tøsdal.

Er det lovleg?

Teknikmagasinet sel lanterner stykkevis og i 10-pakningar for knappe 200 kroner.

VG fortalte i fjor om eit ambulansefly som var nær på å kollidera med ei tilsvarande lanterne.

– Sånne lanterner må ikkje brukast nærmare enn 10 kilometer frå flyplass, sa lufthamnsjef Malfred Slydal på Leknes lufthavn til VG.

Tøsdal er meir enn 10 kilometer frå Flesland, men berre få kilometer frå Vaksinen og Ulven. Men aktiviteten på Ulven plar vera lik null når det er mørkt, så truleg var Michelsen på trygg grunn då han fyrte i lanterna si på søndag.