Lysekloster herja med Valdres
Mål-bonanza då Lysekloster senka botnlaget Valdres med 19-0 (!) Sju av måla vart signert Simen August Næss.
Bildeserie:
20. juli slo Lysekloster Sogndal 2, og klatra med det forbi Fana på tabellen. I ettermiddag var det Valdres som kom på besøk til 31 varmegradar i Lysefjorden.
I ein kamp som hadde lagt inn vasspausar for at spelarar og dommarar ikkje skulle få heteslag, vart det sete ny klubbrekord for Lysekloster - då audmjukinga nådde 16-0 passerte laget den førre rekorden på scora mål frå 2011.
Valdres møtte på Lysekloster Framo Idretspark med det meste mot seg;
• 8. juni slo Fana dei 10-0
• 15. juni slo Djerv 1919 dei 10-1
• 22. juni slo Brann 2 dei 7-1
• 20. juli slo Vard Haugesund dei 11-0
Speaker kunne før kampen tørt melda følgjande;
– Når eg no skal lesa opp innbyttarane til Valdres, vert det heller lett - dei har ingen med seg ...
7 x Næss
Kampen vart prega av eitt lag, og spesielt éin spelar.
Lysekloster sin Simen August Næss opna ballet med ei scoring i det sjuande speleminuttet, og han stoppa ikkje før han sette inn sitt sjuande mål i det 88. minuttet.
Til pause stod det 7-0 til Lysekloster, og mange lurte nok på om Lysekloster ville ta det roleg i rekordvarmen, eller kanskje gjera fleire spelarbyte etter pause.
Lett ironisk
Etter pausen stilte Lysekloster med den same lagoppsettinga som før pause, og måla heldt fram med å renna inn.
I løpet av dei siste 35 minutta valde trenar Ruben Hetlevik å skifta ut fem av spelarane sine, og i same tidsrommet scora Lysekloster åtte mål.
Etterkvart vart det tillaup til lett ironisk stemning mellom spelarane og publikum om kor dette ville enda;
«Vi går for uavgjort» og «no vil vi sjå to-talet» var meldingar som kom frå tribunen.
All ære til Valdres
Etter kampen ligg no Lysekloster på tredjeplass på tabellen med 28 poeng, men med éin kamp meir spelt enn Djerv 1919 og Vard Haugesund med sine 31 og 30 poeng.
Då Næss sette inn det sjuande målet rykka han òg opp som toppscorar i Norsk Tipping-ligaen avd. 4, med 13 scora mål så lang i sesongen.
Og Valdres?
Dei fekk mykje sympati frå publikum i Lysefjorden. Som ein tilskodar sa det;
– Dei skal no ha for å reisa rundt å tapa så mykje helg etter helg.
Lysekloster - Valdres 19-0 (7-0)
Målskårarar:
Simen August Næss (7. 28. 37. 41. 45. 75. 88.)
Karol Krzysztof Zielinski (10. 47. 54. 59.)
Even Hepsøe Vetås (14. 86.)
Dino Omerovic (58.)
Thorvald Modahl Trætteberg (62.)
Alonso Sanches Gonzales (66. 77. 82.)
Martin Pedersen (71.)
Tropp og kampfakta på fotball.no
Neste heimekamp for Lysekloster er mot Stord laurdag 3. august.
Spennande? Vil du ha ukas høgdepunkt i innboksen?
Les meir om
Last ned Midtsiden-appen idag
No kan du følgja nyhende frå Os - rett i appen.
- Gratis å lasta ned
- Bli varsla straks noko skjer
- Tilgjengeleg i App Store og Google Play Store
For å få tilgang til alle sakene i appen må du vera abonnent.