Må slå Austevoll for å delta i NM

Etter 3-1-siger borte over Stord palmesøndag skal Os spela andre og siste kvalifiseringsrunde til årets NM.

Også denne kampen går på bortebane, onsdag klokka 18 startar Austevoll - Os.

– Eg har forstått det sånn at dei er veldig gira der ute, seier Os-trenar Karl Kvile.

– Det kan eg forstå, spesielt med tanke på at vi har tre austevollingar i stallen. No er det berre to av dei som speler i morgon, men det blir nok kjekt og spennande for desse òg, å koma heim og spela.

Frode Storebø er framleis ute med skade, men Marius Mikkelsen og Alexander Dale er speleklare. Også Hafsås er framleis ute, og enkelte hosta og harka litt på trening i går, etter influensa, men Os skal kunna stilla same tropp som mot Stord.

– Går vi på ein smell så blir det mindre kjekt, men det skal ikkje skje. Vi reiser ikkje ut der for å undervurdera dei, men vi meiner sjølvsagt at vi skal vinna i morgon.

Begge spelte NM i fjor

Austevoll har slått Sund 2-1 i sin kvalifiseringskamp. Sund er spådd som nest best i Os og Austevoll si avdeling i 4. divisjon i år.

Sist Os møte Austevoll var i serien i 3. divisjon i 2016, då Os berga 4. plassen og heldt seg i divisjonen, mens Austevoll rykte ned.

I 2016 vann Os begge oppgjera, 4-0 heime og 0-1 borte.

I 2017 kvalifiserte både Os og Austevoll seg til NM. Os rauk ut med 1-4-tap for Nest-Sotra i første runde, Austevoll, som slo Lyngbø og Varegg i kvalifiseringsrundane, tok imot Brann og tapte 0-7.

Andre lokaloppgjer

Forutan strileoppgjeret mellom Austevoll og Os skal desse laga frå Hordaland i elden i andre kvalifiseringsrunde onsdag og torsdag:

Onsdag:
Gneist - Øystese
Sandviken - Nordhordland
Trott - Tertnes

Torsdag:
Lyngbø - Arne-Bjørnar

Dei fire laga som går vidare vil truleg møta Brann, Åsane, Nest-Sotra og Fana.

Frå Hordaland er desse sju laga direkte kvalifisert til første NM-runde: Brann, Åsane, Nest-Sotra, Fana, Lysekloster, Fyllingsdalen og Sotra.