Erik Kanestrøm trudde han gav Os 1-0-leiing før pause, men linjedommar blåste av for offside. (Foto: KVB)

Må venta med å feira

Os gjekk på sitt første tap sidan 9. april, og må vinna ein av dei tre siste kampane for å sikra opprykket.

image
image
image
image
image
Av: Kjetil Vasby Bruarøy

Os inviterte til opprykkskamp då dei i dag tok imot Sandviken, som ligg på 3. plass.

Lyngbø på 2. plass låg 10 poeng bak Os, med siger i dag ville opprykket vore i hamn.

Men Sandviken var ikkje enkle. Borte i vår blei det 3-3, årets einaste uavgjorte for Os, i dag blei det tap.

Os - Sandviken 1-2 (0-0)
Målskårar, Os: Rafael Villén
Os: Anders Fossen Lunde - Anders Havsgård, Alexander Dale, Vegard Strønen Skeie, Harry Moore - Marius Mikkelsen, Steffen Kvamsdal, Rafael Villén - Erik Kanestrøm, Øystein Takle Eide og Sander Kvittingen.
Innbytarar med speletid: Martin Eidsvik, Torkel Hjertnes og Endre Brenne.

Os har ein del skader og noko fråvær i troppen, og måtte klara seg utan blant andre Chris Sunde Midtun, Mats Cato Moldskred, Christoffer Hafsås, Frode Storebø og Fabian Bødtker.

Første omgang blei ganske jamn. Begge lag hadde corner og frispark frå farleg avtand i opningsminutta, Sandviken hadde skot som sendte Lunde ut i full strekk og Os hadde ei skåring som kanskje var feilaktig annulert for offside.

Gjestane tok leiinga i 53. minutt, men fem minutt seinare utlikna Villén på retur.

Sandviken tok leiinga igjen i 74. minutt, og dette blei kampens siste mål.

– Eg synest Sandviken lykkast med opplegget sitt, mens vi sjølv var upresise i pasningsspelet og for svake i duellane. Vi såg rustne ut, og spelet blei i periodar krampeaktig, seier Os-trenar Tim Henrik Sperrevik.

I sluttminutta hadde Villén to skot til på mål, men serieleiaren klarte ikkje å unngå tap.

– Dette blei ei ripe i lakken. No får vi brette opp ermene så vi får ei god treningsveke frå måndag av.

Nær opprykk likevel

Det såg lenge ut som om Os likevel ville berga opprykket i dag, då Telavåg leia 1-3 over Lyngbø. Men det einaste laget som kan truga Os sitt opprykk kjempa seg tilbake.

På 3-3 ville det berre vore små, teoretiske sjansar for at Os sitt opprykk kunne ryka, Os har nemleg ein målforskjell på heile 55, mot Lyngbø sine 17 ...

Men Lyngbø klarte å vinna 3-4, og er dermed 7 poeng bak Os på tabellen før dei tre siste rundane.

Os speler borte mot Telavåg (9. plass), heime mot Frøya (5. plass) og borte mot Valestrand Hjellvik (10. plass) i dei tre siste kampane. Éin siger er nok, men den kom altså ikkje i dag.

 

Fleire saker