Mangla bilbelte - fekk to prikkar
UP tok trafikksyndarar i fleire ulike kategoriar i Os i går. Politiet rykte også ut på eit sykkeluhell – og på melding om mann med kvitt pulver i ein pose.


Tysdag hadde UP kontroll av både fart og bruk av tryggleiksutstyr og mobiltelefon i Os, blant anna på Byvegen ved Elvebakken.
2 blei tatt for bruk av mobiltelefon, 5 for manglande bilbelte og 6 fekk forelegg for høg fart, den største syndaren kjørte i 78 km/t i ei 60-sone.
Éin av dei kontrollerte blei tatt for manglande sikring av barn under 15 år, noko det for to år sidan blei skjerpa straff for.
Manglande sikring av barn skal føra til to prikkar på førarkortet, fire om du er fersk bilførar i prøveperiode, og 2000 kroner i forelegg.
Narkotika på bussen?
Rundt midnatt i går fekk politiet melding om ein mann på buss på veg til Os med ein liten pose med noko kvitt pulver i.
Politiet rykte ut, men då hadde mannen gått av bussen og stukke frå staden på ein sykkel.
Politiet tok ein runde og såg etter mannen, men fann han ikkje.
Gut ramla på sykkel
Klokka 16.20 rykte politiet ut på melding om påkjørt syklist.
– Det viste seg at det ikkje var andre involverte, guten (13) hadde ramla og han hadde berre nokre skrubbsår, fortel politibetjent Anne Lyssand.
Politiet sjekka også ein uregistrert motorsykkel som sto ytst på eine moloen i sentrum, og ein moped som har stått parkert i fleire veker i Industrivegen.
Ingen av dei var stolen.