Mangla litt på toppfarten

Søndag kveld (norsk tid) gjekk 1500 meteren av stabelen i The Olympic Oval i Calgary. Etter at Sverre Lunde Pedersen satt ny personleg rekord på 1000 meteren laurdag var det knytt spenning til om han ville klare å gjera det same når distansa blei 500 meter lengre.

Slik gjekk det diverre ikkje. Sverre gjekk inn på 1.44.11 etter å ha opna på 23.7 på dei første 300 metra, deretter gjekk rundene på 26.0, 26.5 og 27.7.

– Det blir litt for smått i starten. Eg tykkjer òg han blir litt for passiv med 26.0 på andre runden. Det var heilt fint i fjor, men Sverre har blitt så mykje sterkare at han må komma seg ned på 25-talet, meinte NRK sin ekspertkommentator Even Wetten.

Ny sjanse om ei veke

Wetten var optimistisk på Lunde Pedersen sin vegne.

– Sverre har definitivt kapasiteten, men manglar framleis toppfarten. Det kan kanskje komma allereie om ei veke i Salt Lake City, mente Wetten.

Sindre gjekk seg opp

Sindre Henriksen gjekk i B-pulja tidlegare på dagen. Halvosingen som går for Fana har verkeleg fått gjennombrotet denne sesongen. Med tida 1.45.31 forbedra han ikkje berre sin eigen personlege rekord med 2,5 sekund. Han kvalifiserte seg òg til å få gå med dei beste i A-pulja i det kommande løpet i Salt Lake City.

Rundetidene 24.0, 26.0, 27.4 og 28.7 heldt til ein sterk 3. plass i pulja og opprykk.