Mann tatt på stolen sykkel - av far til eigar
– På tre år har det blitt stole for 70.000 frå hagen vår, seier ein sint huseigar i Varåsen.
I går fortalte vi om to sykkeltjuveri på fire dagar frå same nabolag i Varåsen. Eitt av dei blei filma av overvakingskamera.
I dag fekk vi høyra om nok eit tjuveri, frå den andre enden av Varåsen (nær Industrivegen).
Dette blei same dag oppklart av far til guten som eig sykkelen.
– Eg brukte laurdagen på å leita, og eg snakka med ein del folk. Så møtte eg ein kar som kom køyrande på sonen min sin sykkel.
Initialane står skrive på ramma av sykkelen, så faren kunne raskt slå fast kven sin det var. Vedkomande syklist, ein vaksen mann, påsto at han hadde funne sykkelen ved Amfisenteret. Men der hadde faren allereie leita grundig tidlegare på dagen, så dette blei blankt avvist.
Store verdiar av ungane sine sparepengar
Faren skal ha sagt tydeleg ifrå om kva han synest om sykkeltjuveri, og tok med seg sykkelen.
– Det er lett å tenkja at «det berre er ein sykkel», men verdien er fleire tusen kroner, pengar som sonen min har spart for å kjøpa den. Sykkelen sto éin meter frå inngangsdøra vår, og verken vi eller ungane synest det er kjekt å veta at det går folk i hagen vår om natta for å stela verdisakene våre.
Eigaren av sykkelen er ein 12 år gamal gut. Dei siste tre åra har eldre søsken av guten blitt fråstole både moped og lett motorsykkel. Kjøpt av konfirmasjonspengar.
– Ein skam
Også mopedtjuveriet måtte faren oppklara sjølv.
• Les òg: Mekka på moped i Nordmarka - sikta for tjuveri
– På tre år har det blitt stole verdiar for rundt 70.000 kroner frå hagen vår. Vi har forsikring, men eigenandel er fleire tusen kroner.
– Eg håper verkeleg at politiet tar seg bryet med å oppklara og forfølga desse tjuveria.
– I tillegg til verdiane som går tapt kan desse tjuveria, det at vi har besøk i hagen om natta, vera med på å spreia frykt blant ungane i eit elles fredeleg nabolag. Det synest eg er ein skam, seier «privatdetektiven» i Varåsen.
Spennande? Vil du ha ukas høgdepunkt i innboksen?
Les meir om
Tilbod: 1 månad for 1 kr
No kan du lesa Midtsiden.no i 1 månad for kun 1 kr.
- Tilgang til alt innhald
- Utan bindingstid
- Frå 145 kr/md.
Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.