Markerer dagen med to turar
Norges idrettsforbund oppfordrar skular å markera Verdas aktivitetsdag torsdag 10. mai. I Os lager eldrerådet to turar, begge med kulturhistoriske innslag.
Som medlemsland av Verdas helseorganisasjon (WHO) er Noreg med og markerer Verdas aktivitetsdag, eller «Move for Health Day», som den heiter internasjonalt.
Den globale merksemda blir retta mot helsegevinstene ved dagleg fysisk aktivitet og fysisk aktivitet som forebygging av livsstilssjukdomar.
Idrettsforbundet, saman md Nasjonalforeningen for folkehelsen, Kreftforeningen, Legeforeningen og Norsk Fysioterapeutforbund, oppfordrar skular å markera dagen, og det kjem sikkert fleire skular i Os til å følgja opp.
Aktive eldre
Men også Os Eldreråd vil ha fokus på aktivitet torsdag 10. mai.
– Vi eldre er også ei aktiv gruppe som er opptatt av livskvalitet og god helse, seier Olav Djuve, som overtok som leiar for eldrerådet tidlegare i år.
Eldrerådet har i samarbeid med Os Turlag sett opp to turar torsdag formiddag, turar for alle, begge med start klokka 11.
Kulturstopp på Lyngheim
Kultursjef Lisbeth Axelsen stiller opp på Luranetunet før start på turane.
– Vi har med oss turlaget og arrangerer tur til Raudlistova frå Gåssand og tur til Lyngheim frå Luranetunet.
– Turen til Lyngheim går frå Luranetunet forbi Solstrand og på Lyngheim kjem Nils Georg Brekke for å fortelja om det historiske tunet stiftinga bygger ved Lyngheim.
På Raudlistova vil Dagfinn Riple fortelja soger om stova og folk som har levd der.
Begge turane varer rundt to timar og er opne for alle.