Markerer moloen

Bildeserie:

1 av 5

Til helga er det sommarferie for entreprenørane som jobbar med tomta til Oseana og den nye moloen ut frå Mobergsneset.

Moloen er ny, og sjølvsagt ikkje merka av på sjøkart. Den er også så låg at om du kjem med båt frå sør, og har sving inn mot Kuvågen på veg mot Os, så ser du lysa frå sentrum over moloen.

- Tilreisande båtfolk kjenner gjerne ikkje til prosjektet. Er moloen synleg nok nattestid?

- Å merka moloen er noko vi har hatt fokus på, seier prosjektansvarleg Magnar Eide frå Straume Rådgivning.

I går sto tre maskiner ytst på moloen, truleg for å markera denne betre. I tillegg seier Eide at det er plassert lys langs moloen. Vi såg eitt, dette var det ikkje lys i måndag i 23.30-tida.

- Det skal vera fleire, og det er sensorar i dei, så det kan henda at det ikkje var mørkt nok, seier Eide.

Stein frå Sotra
Entreprenør Vassbakk & Stol held omtrent framdriftsplanen, som seier at tomta skal vera klar til betongarbeid før ferien.

- No kjem dei tilbake ei veke før ferien er over, for å ta siste del. Mobilisering til betongarbeid startar 3. august.

Moloen skal plastrast med storstein etter sommarferien, eit arbeid som skal vera ferdig 15. september.

Steinen er i produksjon på Skaganeset i Sund kommune, og kjem til Os med lekter.

Fri passasje før ferien?
Fredag tar arbeidarane ferie, og før ferien tar dei sikte på å opna for passasje frå Os over anleggsplassen og bort til friluftsarealet i Mobergsvikjo.

- Eg ser det er ein del som legg kveldsturen eller fisketuren til moloen på kveldstid. Har det vore opna for dette?

- He, he, nei det har ikkje det, dei har nok funne ein passasje. Men slike prosjekt verkar ofte som ei magnet på folk, og eg forstår at det er kjekt å bevega seg ut på fjorden på ny molo, seier Eide.

Men det er altså først laurdag 4. juli at det blir opna for at publikum kan kryssa anleggsplassen på veg til Vikjo. Då blir det også opna for å gå ut til moloen.

27. juli byrjar arbeidet igjen, så sundag 26. juli blir siste dag med passasje over anleggsplassen.