Martine (16) blei toppskårar i seniordebuten
Nore Neset opna sesongen med siger i to kampar. 16 år gamle debutantar prega kampane.
I helga hadde Nore Neset sine handballdamer sesongopning med kamp både laurdag og søndag.
Før sesongstart mista dei fleire spelarar.
– To spelarar har lagt opp, fire har gått til Os for å prøva seg i 2. divisjon. Heldigvis kjem det opp nye talent frå eigen klubb, fortel trenar Fredrik Andresen.
– Desse, saman med resterande stamme frå førre sesong, utgjer ein god kombinasjon og kjem berre til å bli betre og betre utover hausten og vinteren.
I helga blei det siger i begge sesongens første kampar.
Tre debutantar skåra 18 mål til saman
Til første kamp stilte Nore Neset med ein tynn stall og heile fem spelarar frå 2001-årgangen. Tre av desse var debutantar som til saman skåra 18 mål.
Martine Særvold Pedersen blei toppskårar med heile 8 mål.
• Les òg: Nora Berge skåra 9 mål i seniordebuten (2016)
Nordre Fjell - Nore Neset 22-24
Nore Neset: Ann-Kristin Lyssand, Elisabeth E. Frøyset (3), Marielle Engelsen (3), Monica Engelsen, Anette Holmefjord og 16-åringane Marthe Færøvik, (1) Ida Wik (1), Mia Grindevoll (debut, 1 mål), Lena Skeie (debut, 7 mål) og Martine S. Pedersen (debut, 8mål)
– Det blei ein tøff kamp seint på kveld (kampstart kl 19.45) på Ågotnes. Vi møter eit noko eldre og tyngre lag og det er tydeleg at vi treng å få betre fart både med og utan ball, men ungdomane imponerte, seier Andresen.
Ny kamp 18 timar seinare
Søndag klokka 15, cirka 18 timar etter at serieopninga var overstått, var det heimekamp mot Kleppestø.
– Det var tydeleg å sjå at jentene hadde ein tøff kamp i beina, men vi gjorde jobben vår og kom til mange sjansar. Dessverre blei det ein del stolpeskot, og Kleppestø har i tillegg ein god keeper.
Andresen gler seg over at også Nore Neset har gode målvaktar.
– Ann Kristin Lyssand og Monica Engelsen heldt oss inne i kampen og i 53. minutt tok vi leiinga for første gong.
Nore Neset heldt roen og drog sigeren i land. Også denne kampen blei Martine toppskårar, men denne gong saman med Marte Haugsdal.
Nore Neset - Kleppestø 20-18
Nore Neset: Ann-Kristin Lyssand, Elisabeth E. Frøyset (1), Marielle Engelsen (1), Monica Engelsen, Anette Holmefjord, Marthe Færøvik, (1) Ida Wik (1), Mia Grindevoll (2), Lena Skeie, Martine S. Pedersen (5), Jeanett Haugland (2), Marte Haugsdal (5), Trude Tysnes (2), Ellinor Hagen.
Nore Neset speler neste kamp borte mot Sund 17. oktober.