Måtte kjøra pasient heim
Vegvesenet tok trimma moped, ein gjeng utan bilbelte og avskilta ein bil som hadde pasient om bord.
Tysdag har vegvesenet hatt trafikkontroll i Os. Dei hadde med seg bil med skiltlesar, men kontrollerte også bilbeltebruk.
– Vi sto i Industrivegen frå klokka 11 til 18, bortsett frå då vi hadde matpause, og kontrollerte oppunder 700 bilar, fortel Bjarne Ottarlei frå Statens vegvesen.
Transport utan EU-godkjenning
Blant den store mengda bilar var det berre éin som blei avskilta, mot 10-20 som den effektive skiltlesaren ofte oppdagar.
– Til gjengjeld blei det litt arbeid med denne bilen, som var registrert for transport av sjuke og rørslehemma.
Bilen var ikkje EU-godkjent.
– Føraren hadde pasient om bord så vi lét vedkomande kjøra pasient til institusjon og så følgte vi etter og avskilta bilen på staden.
Tung last og mange hestekrefter
I tillegg blei det tatt rundt ti utan bilbelte og eit lite knippe bilar med for tung hengar i forhold til kva bilisten hadde førarkort på.
Vegvesenet tok også ein mopedist på trimma moped.