MC-ulykke på Hatvikvegen

Måndag rundt klokka 16.20 rykte politi og ambulanse ut til ulykke med lett motorsykkel på Hatvikvegen.

– Ein fotgjengar kryssa vegen i nærleiken av fotgjengarfeltet ved Finnebrekka. MC-en glei og velta då førar skulle bremsa for jenta som kryssa vegen, fortel politibetjent Kjetil Hansen.

Fotgjengar blei ikkje råka. MC-førar, ein 17 år gamal gut, framsto som oppegåande, men blei tatt til legevakt for sjekk.

– Jenta kryssa ikkje vegen i sjølve fotgjengarfeltet. Det oppsto ei misforståing mellom fotgjengar og MC-førar, i tillegg var det glatt på den våte vegbanen. Vi ser på hendinga som eit uhell, og har ikkje oppretta sak, seier politiet.