Med dei flottaste strendene

Den lokale turoperatøren Vitaltour har tydelegvis teft. TripAdvisor si kåring av dei beste strendene i Europa resulterte i gull og sølv til destinasjonane til selskapet frå Os.

Kåringa: Dei 10 beste strendene i Europa

Øvst på lista over dei beste strendene tronar Agia Napa med nabobyen Protaras (Fig Tree Bay med nærområde) to plassar bak. Mellom dei to har Skiathos i Hellas snike seg inn.

– Det er jo kjekt å sjå at reisemåla våre blir vurdert som så gode, seier marknadssjef Inger Berit Bøyum i Vitaltour med eit smil.

Samlar innsatsen

Denne sommaren har Vitaltour valt å retta innsatsen meir mot Fig Tree Bay/Protaras enn mot Agia Napa. Men bilturen mellom dei to byane tar berre 15 minutt så gullstranda er innanfor passeleg rekkevidde for dei som bur på bronsestranda.

–Vi har vore i Fig Tree Bay heilt sidan starten. Ei periode har vi òg hatt hotell i Agia Napa om sommaren, men no har vi valt å gå tilbake til det opprinnelege og konsentrerer innsatsen i Fig Tree Bay, forklarer Bøyum.

–Barnefamiliar er den viktigaste målgruppa vår. Fig Tree Bay er litt rolegare enn Agia Napa og vi trur reisemålet passar betre for kundane våre.

Nytt flyselskap

Vitaltour sitt første fly i sommar lettar frå Flesland måndag 13. juni.

– Salet har så langt gått bra. Vi ligg om lag på same nivå som i fjor.

– Nytt er at vi har skifta flyselskap til det danske Jet Time. Dette gjev oss betre avgangstider frå Bergen med utreise klokka 10 måndag formiddag. Vi har brukt selskapet ei stund allereie og fått gode tilbakemeldingar frå gjestane, avsluttar Bøyum.

Kåringa av Europas beste strender er gjort av reisenettstaden TripAdvisor, der lesarane har rangert strendene basert på eigne erfaringar.