Med høg risiko

Torsdag morgon rykte patruljen frå Os lensmannskontor ut på ei melding om farleg, og mogleg fyllekøyring, på Byvegen i retning Os.

- For å koma raskt ut og stoppa bilføraren køyrde patrulja utrykning med blålys og sirener.

- Diverre opplevde dei episodar som kunne ha blitt fatale, fortel politioverbetjent Terje Sperrevik.

Sprang ut i vegen

Ved eit gangfelt på Byvegen sprang to vaksne ungdommar ut i vegen rett framfor patruljebilen.

- Vi skal sjølvsagt vera ekstra merksame når vi køyrer utrykning, men eg vil samstundes oppmoda dei som ferdast i trafikken til det same.

- Det har ei viss meining når vi, brannvesenet og ambulansane køyrer med blålys. Då er det ein situasjon som gjer at vi har behov for å koma raskt fram, slår Sperrevik fast.

Politioverbetjenten oppmodar ikkje berre bilistar til å følgje ekstra godt med i spegelen, men òg fotgjengarar til å sjå seg ekstra godt fore før dei kryssar vegen.

Bilar i kø det største problemet

Brannsjef Stein Gjøsund kjenner seg igjen i utfordringane Terje Sperrevik fortel om.

- For oss er den største utfordringa når vi tek att bilar i ein kø.

- Då opplever vi gjerne at ein av bilane i køen oppdager oss og svinger inn til sida, medan bilen bak legg seg ut for å køyre forbi denne.

- Når vi då samstundes er på veg forbi heile køen kan det fort oppstå farlege situasjonar, forklarar Gjøsund som støttar Sperrevik si oppmoding om at bilistar er merksamme.

P.S. Bilføraren politiet var på jakt etter blei stoppa og kontrollert. Vedkommande blåste 0,0 og viste fram gyldig utanlandsk førarkort.